Nastaśsia Kaściuhova złamała nahu — jechała na samakacie pa Varšavie, kali nasustrač vylecieła aŭto
Prasiadzieŭšy 9 hadzin u čarzie ŭ balnicy, Nastaśsia Kaściuhova, ekśpiertka pa kamunikacyi i eks-supracoŭnica Ofisa Śviatłany Cichanoŭskaj, padzialiłasia svaimi ŭražańniami ad polskaj biaspłatnaj miedycyny.
Kiroŭca tolki pacisnuŭ plačyma
Nastaśsia raskazała «Našaj Nivie», što złamała nahu, kali ŭpała z samakata na pierachodzie ŭ Varšavie. Kiroŭca aŭto nie pahladzieŭ pa bakach na nievialikim zavułku ź ziebraj i pačaŭ ruch, kali da jaho z adnaho boku na chutkaści jechaŭ viełasipiedyst, a z druhoha — Nastaśsia na samakacie.
«Viełasipiedyst paśpieŭ zatarmazić u apošni momant, ja taksama pasprabavała, ale tarmazoŭ samakata nie chapiła. Kab nie ŭlacieć u mašynu, ja pačała tarmazić jašče i nahoj. U vyniku vylecieła faktyčna jamu pad koły, i ŭpała z samakatam ź vielmi vyviernutym stupakom, jakim tarmaziła. Voś niedzie tam naha i złamałasia», — apisvaje vypadak Kaściuhova.
Kiroŭca, ź jejnych słoŭ, tolki pacisnuŭ plačyma, a jana pakulhała dadomu, jašče nie viedajučy, što ŭ jaje złamanaja naha.
Pa miedycynskuju dapamohu Nastaśsia źviarnułasia tolki na nastupny dzień.
Vyrašyła skarystacca pieravahami ZUSa (abaviazkovyja adličeńni na sacyjalnaje i miedycynskaje strachavańnie ŭ Polščy). U vyniku dziaŭčyna praviała ŭ SOR (balničnaje adździaleńnie ekstrannaj miedycynskaj dapamohi) dzieviać hadzin sa złamanaj nahoj u kalidory, zahačanym roznymi inšymi paciarpiełymi, jakija taksama čakali svajoj čarhi.
9 hadzin — heta jašče nie šmat?
«Za hety čas mnie pisali znajomyja, jakija raspaviadali, što čakali i 12, i 14 hadzin, niekatorym daloka nie ź pieršaha razu stavili pravilny dyjahnaz, i davodziłasia viartacca jašče raz. Usio heta možna było b zrazumieć, kali b heta nie kaštavała takich hrošaj štomiesiac», — skardzicca Kaściuhova, dadajučy, što z kožnym hodam jana płacić usio bolš hrošaj u ZUS.
«Treba skazać, što ŭ mianie byli pretenzii da biełaruskaj dziaržaŭnaj miedycyny, ale paśla pavinna skazać, što ŭ cełym zrazumieła, čamu ŭsie, chto moža jeździć u Biełaruś, pryjazdžajuć tudy na abśledavańni i lečać zuby. U paraŭnańni ciapier jasna, što ŭ nas usio było vielmi niadrenna», — pryznajecca jana.
Nastaśsia zrabiła dla sabie vysnovu, što polskaja dziaržaŭnaja miedycyna chaj zastajecca dla niejkich vyklučnych vypadkaŭ, kali patrebna darahaja apieracyja ci niejkija inšyja maštabnyja rečy.
«A dla takich vypadkaŭ dastatkova pryvatnaj strachoŭki i ekśpierymientavać bolš niama žadańnia», — padsumavała jana.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii7
Kamientary
A čerhi ŭ paliklinikach Jeŭropy - zvykłaja źjava. Ja ŭ Hišpanii pa 4-5 hadzin nie raz siadzieŭ u adzialeńni "chutkaj". Pryčym u płatnych klinikach taja ž prablema. Navat kali pa zapisu - usio roŭna budzieš siadzieć hadzinu-druhuju.