The Atlantic: Tramp padtrymaŭ ideju źmiakčeńnia sankcyj suprać Rasii ŭ abmien na vyzvaleńnie palitviaźniaŭ

Prezident ZŠA Donald Tramp pahadziŭsia z prapanovaj svajho śpiecpasłańnika pa Uschodniaj Jeŭropie źmiakčyć amierykanskija sankcyi suprać Rasii ŭ abmien na vyzvaleńnie palityčnych źniavolenych. Pra heta piša vydańnie The Atlantic.

Donald Tramp i Uładzimir Pucin padčas sustrečy na Alascy ŭ žniŭni 2025 hoda. Fota: Jae C. Hong / AP

Pavodle infarmacyi vydańnia, takaja inicyjatyva źjaviłasia niekalki miesiacaŭ tamu i ciapier znachodzicca na rańniaj stadyi. Jaje meta — vyvieści amierykanska-rasijskija adnosiny z tupiku i pašyryć pieramovy pamiž Vašynhtonam i Maskvoj za miežy pytańnia vajny va Ukrainie.

U vypadku realizacyi hetaj schiemy Rasija mahła b atrymać mahčymaść pastupova viartacca ŭ suśvietnuju ekanomiku, a ZŠA — zaklučać z Maskvoj ekanamičnyja pahadnieńni ŭ śfierach nafty, dyzielnaha paliva, redkaziamielnych mietałaŭ i inšych tavaraŭ.

Vyzvaleńnie palityčnych źniavolenych pa humanitarnych pryčynach, jak adznačaje The Atlantic, taksama mahło b spryjać umacavańniu pazicyj Trampa ŭ jaho namahańniach atrymać Nobieleŭskuju premiju miru.

Pry hetym prapanavany padychod jaŭna vykliča niehatyŭnuju reakcyju va Ukrainie, siarod jeŭrapiejskich sajuźnikaŭ ZŠA i častki amierykanskich zakanadaŭcaŭ. Pavodle The Atlantic, adnaŭleńnie ekanamičnych suviaziaŭ z Rasijaj mahło b prynieści joj dadatkovyja dachody, jakija mohuć vykarystoŭvacca dla praciahu vajny suprać Ukrainy i ŭzmacnieńnia vajskovaha patencyjału ŭ dačynieńni da krain NATO.

22 vieraśnia śpiecpasłańnik Trampa pa Biełarusi Džon Koŭł paviedamiŭ, što ZŠA pačali pracu nad pytańniem rasijskich palityčnych źniavolenych. Jon zajaviŭ, što adpaviednyja śpisy ŭžo składzienyja, ale admoviŭsia nazyvać imiony. Padobny padychod amierykanskaja administracyja ŭžo vykarystoŭvała ŭ dačynieńni da Biełarusi. 

Paśla viartańnia Trampa ŭ Bieły dom Rasija i ZŠA praviali dva abmieny źniavolenymi. U lutym 2025 hoda Maskva vyzvaliła amierykanca Marka Fohiela, asudžanaha za kantrabandu narkotykaŭ, a Vašynhton pieradaŭ Rasii Alaksandra Vińnika, jakoha amierykanskija ŭłady abvinavačvali ŭ admyvańni miljardaŭ dalaraŭ praz kryptabiržu BTC-e.

U krasaviku Rasija abmianiała Ksieniju Karelinu, asudžanuju za pieravod 51,8 dalara ŭ dabračynny fond va Ukrainie, na Artura Piatrova, jakoha ŭ ZŠA abvinavačvali ŭ kantrabandzie mikraelektroniki dla rasijskaj vajskovaj pramysłovaści.

U žniŭni 2026 hoda paśla pieramoŭ z Trampam Uładzimir Pucin vyzvaliŭ byłoha amierykanskaha marskoha piechacinca Robierta Hiłmana, jaki znachodziŭsia pad vartaj z 2022 hoda. Śpiecpasłańnik prezidenta Rasii Kirył Dźmitryjeŭ tady zajaviŭ, što rašeńnie było pryniataje z humanitarnych mierkavańniaŭ.

Kamientary da artykuła