Kreml vyzvaliŭ źniavolenaha byłoha amierykanskaha marpiecha. Za što — pakul nieviadoma
Rasija vyzvaliła byłoha amierykanskaha marskoha piechacinca Robierta Hiłmana, jaki znachodziŭsia ŭ rasijskaj turmie z 2022 hoda. Rašeńnie ab jaho pamiłavańni, pavodle amierykanskich čynoŭnikaŭ, uchvaliŭ Uładzimir Pucin z «humanitarnych mierkavańniaŭ», pakolki stan zdaroŭja źniavolenaha moh być ciažkim, paviedamlaje Reuters.
11 žniŭnia Hiłman razam sa svajoj maci Ninaj užo znachodziŭsia na borcie samalota Dziarždepartamienta ZŠA, jaki lacieŭ z Rasii ŭ Vašynhton.
Jaho vyzvaleńniu papiaredničali nastojlivyja patrabavańni Vašynhtona. Dziaržsakratar ZŠA Marka Rubia, pavodle źviestak amierykanskaha boku, zaklikaŭ vyzvalić Hiłmana padčas pieramoŭ z kiraŭnikom MZS Rasii Siarhiejem Łaŭrovym 23 lipienia. ZŠA nastojvali na hetym, kab amierykaniec moh svoječasova atrymać nieabchodnuju miedycynskuju dapamohu.
Pradstaŭnik amierykanskich uładaŭ, jaki asabista razmaŭlaŭ z vyzvalenym Hiłmanam, paviedamiŭ, što toj moža samastojna chadzić i razmaŭlać. Raniej jaho svajaki i pravaabaroncy zajaŭlali, što ŭ mužčyny dyjahnastavali dysacyjatyŭny stupar, a ježu jamu davodziłasia atrymlivać praz zond.
Padčas pieralotu Hiłmana pavinny ahledzieć čatyry daktary. Paśla prybyćcia ŭ ZŠA jaho, vierahodna, nakirujuć na lačeńnie i reabilitacyju ŭ śpiecyjalizavany centr u Techasie.
Hiłmana zatrymali ŭ studzieni 2022 hoda ŭ ciahniku Suchumi — Maskva. Rasijskaje śledstva śćviardžała, što jon u niećviarozym stanie parušyŭ hramadski paradak i prajaviŭ ahresiju ŭ dačynieńni da supracoŭnika palicyi.
Pieršapačatkova sud prysudziŭ jaho da čatyroch z pałovaj hadoŭ kałonii za prymianieńnie hvałtu da pradstaŭnika ŭłady. Paśla apielacyi termin skaracili da troch z pałovaj hadoŭ. Adnak paźniej suprać Hiłmana zaviali novuju spravu, źviazanuju z kanfliktami z supracoŭnikami kałonii i śledčym. U 2024 hodzie pa novych abvinavačańniach jamu pryznačyli jašče siem hadoŭ i adzin miesiac pazbaŭleńnia voli.
Prykładna miesiac tamu Hiłmana pieraviali z turemnaj balnicy ŭ Varoniežy ŭ psichijatryčnaje adździaleńnie cyvilnaj kliniki. Jaho maci i pradstaŭnik amierykanskaha konsulstva paviedamlali, što im nie dazvalali naviedvać jaho ŭ balnicy.
Vyzvaleńnie stała vynikam napružanych pieramoŭ pamiž amierykanskimi i rasijskimi pradstaŭnikami, jakija praciahvalisia ŭ vychadnyja. Amierykanskija čynoŭniki padkreślili, što ZŠA nie pieradavali Rasii nijakich rasijskich źniavolenych u abmien na Hiłmana. Jany nazvali vyzvaleńnie «žestam dobraj voli».
Paśla viartańnia ŭ ZŠA Hiłmana płanujuć sustreć śpiecyjalny pradstaŭnik prezidenta ZŠA Styŭ Uitkaf i namieśnik daradcy pa nacyjanalnaj biaśpiecy Siebaśćian Horka.
Tramp pastaviŭ pad sumnieŭ pieradaču Ukrainie licenzii na rakiety dla Patriot
Niamiecki fiermier vyrazaŭ na kukuruznym poli Pucina i Trampa
Tramp: Pucin razumieje, što ZŠA pradajuć zbroju krainam NATA, a nie niepasredna Ukrainie
Amierykanskija sienatary ŭzhadnili zakonaprajekt ab «piakielnych sankcyjach» suprać Rasii ź Biełym domam
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana2
Kamientary