Kiraŭnik MZS Francyi: Dźvie traciny raźviedvalnaj infarmacyi Ukraina atrymlivaje ad jeŭrapiejcaŭ

Ministr zamiežnych spraŭ Francyi Žan-Nael Baro zajaviŭ, što dźvie traciny raźviedvalnych źviestak, jakija ciapier pieradajuć Ukrainie, pastupajuć ź jeŭrapiejskich krain, u tym liku z Francyi. Pra heta jon skazaŭ u efiry radyjostancyi France Inter, paviedamlaje «Jeŭrapiejskaja praŭda».

Žan-Nael Baro. Fota: AP Photo / Aurelien Morissard

Pa słovach Baro, z pačatku vajny va Ukrainie ŭžo kala dvaccaci razoŭ hučali prahnozy, što Ukraina pacierpić parazu, a ZŠA admoviacca ad jaje padtrymki. Adnak, jak śćviardžaje francuzski ministr, Jeŭropa ŭžo daŭno zabiaśpiečvaje Kijevu asnoŭnuju častku dapamohi.

Baro taksama abvinavaciŭ Kreml i jaho trolaŭ u sacyjalnych sietkach u sprobach adviarnuć jeŭrapiejcaŭ ad padtrymki Ukrainy. Jon padkreśliŭ, što baraćba viadziecca nie tolki na poli boju, ale i za śviadomaść ludziej.

Raniej vydańnie The Washington Post paviedamiła, što ZŠA pahražali spynić pieradaču Ukrainie raźviedvalnaj infarmacyi, kali ŭkrainskija vajskoŭcy buduć nanosić novyja ŭdary pa rasijskich enierhietyčnych abjektach.

Prezident Ukrainy Uładzimir Zialenski 13 kastryčnika ŭ intervju radyjostancyi NPR paćvierdziŭ, što ŭkrainskija vajskoŭcy atrymali papiaredžańni i pahrozy, źviazanyja z abmienam raźviedvalnymi źviestkami. Adnak pakul hetyja pahrozy nie byli realizavanyja.

Prezident ZŠA Donald Tramp taksama zajaviŭ u aŭtorak, što abmien raźviedvalnaj infarmacyjaj praciahvajecca. U Jeŭrapiejskaj kamisii adznačyli, što nie bačać nijakich prykmiet spynieńnia pieradačy raźviedvalnych źviestak pamiž Ukrainaj i ZŠA.

Kamientary da artykuła