Pradprymalniki prajšli šeściem pa praspekcie
Sotni pradprymalnikaŭ sabralisia na mitynh pratestu na Kastryčnickaj płoščy i prajšli šeściem da płoščy Niezaležnaści, kab uručyć petycyju deputatam pałaty pradstaŭnikoŭ. Ułady paabiacali pieramovy.
Sotni pradprymalnikaŭ sabralisia na mitynh pratestu na Kastryčnickaj płoščy i prajšli šeściem da płoščy Niezaležnaści, kab uručyć petycyju deputatam pałaty pradstaŭnikoŭ. Ułady paabiacali pieramovy.
12.30 Kala trochsot pradprymalnikaŭ sabrałasia na mitynh pratestu na Kastryčnickaj płoščy.
Pradprymalniki vystavili raściažki z svaimi patrabavańniami.
Vystupiŭ pradprymalnicki lider Aleś Taŭstyka. Ź jahonaj prapanovy mitynhoŭcy sabralisia ŭ kaladny karahod.
Vystupiŭ Aleś Stralcoŭ z Sacyjał-demakratyčnaj partyi: U Biełarusi jość palitviaźni, skazaŭ jon. Ale jość i dziasiatki ekanamičnych viaźniaŭ, pradprymalnikaŭ, jakija trapili za kraty praz žadańnie ŭładaŭ trymać ekanomiku pad svaim poŭnyja kantrolem.
Z palitykaŭ na Płoščy prysutničaje Anatol Labiedźka. Ad pačatku taksama ŭdzielničajuć aktyvisty Ruchu za Svabodu, Maładoha Frontu.
Taksama na Płoščy prysutničajuć dziasiatki achoŭnikaŭ paradku i žurnalistaŭ.
Mocna hraje muzyka z dynamikaŭ. Jana zahłušaje ŭsie patencyjnyja skandavańni i vyhuki.
Na praspekcie supracoŭniki Dziaržaŭtainspekcyi spyniajuć i pieratrasajuć furhony, što kirujucca ŭ bok Płoščy.
Na Płoščy prysutničaje taksama specaŭtamabil, jaki nahadvaje pra niesankcyjavany charaktar schodu i pahražaje specsrodkami.
Kiraŭnictva haradzkoj milicyi pilnuje mitynhoŭcaŭ, kala dziesiaci kameraŭ zdymajuć padziei z roznych rakursaŭ.
Naš kar. praciahvaje znachodzicca na Płoščy, čakajcie nastupnych paviedamleńniaŭ.
12.40 Na mitynhu pradprymalnikaŭ na Kastryčnickaj płoščy vystupili pradstaŭniki rehijonaŭ. Siarod vystupoŭcaŭ jość i biełaruskamoŭnyja. Byli taksama začytanyja zvaroty troch zatrymanych zajaŭnikaŭ akcyi.
Pryjechali na płošču čynoŭniki ź ministerstva ekanomiki i Mienharvykankamu. Jany vystupajuć pierad sabranymi. Niekatoryja ich słovy sustrakajuć śvistam.
Adzin z zajaŭnikaŭ akcyi, Alaksandar Makajeŭ, pryznaŭsia, što ŭściešany kolkaściu udzielnikaŭ, bo raźličvaŭ čałaviek na 50.
Kalinoŭskaha aśvistali pad kryki “Hańba”. Lichačoŭski vystupiŭ, patłumačyŭ sens ukazu j paabiacaŭ, što ŭsie kanstruktyŭnyja prapanovy buduć razhledžanyja.
13.00Načalnika ŭpraŭleńnia pradprymalnictva kamitetu ekanomiki Mienharvykankamu Alaksandra Kalinoŭskaha aśvistali i pravodzili z trybuny pad kryki «Hańba». Kiraŭnik departamentu pa pradprymalnictvie Ministerstva ekanomiki Alaksandar Lichačeŭski ŭ vystupie patłumačyŭ sens ukazu j paabiacaŭ, što ŭsie kanstruktyŭnyja prapanovy buduć razhledžanyja.
Adzin z pradprymalnickich lideraŭ Viktar Harbačoŭ zajaviŭ, što na ŭzroŭni departamentaŭ ich pytańnie vyrašyć niemahčyma. Pradprymalniki vyrašyli pieradać svaje prapanovy ŭ parlament, i ŭ hety momant usie razam rušyli da płoščy niezaležnaści.
Pierad tym, jak pakinuć Kastryčnickuju płošču, udzielniki akcyi zajavili, što kali ich hołas nia budzie pačuty, jany pačnuć zabastoŭku z 1 studzienia.
13.15 Kalona kala kinateatra «Centralny». Pradprymalniki skandujuć «My nia vošy!», a maładafrontaŭcy — «Žyvie Biełaruś!». Hramada achvotna padchoplivaje. Milicyja papiaredžvaje pra zabaronu chadzić natoŭpam ad Kastryčnickaj płoščy da płoščy Niezaležnaści.
13.25 Hałava kalony padyšła da da parlamentu, chvost kalony — kala hatelu «Miensk». Kolkaść udzielnikaŭ naŭzvočna vyrasła. Udzielniki vystrojvajucca na prystupkach i razhortvajuć transparanty jak u bok płoščy, tak i ŭ bok voknaŭ Domu Ŭradu.
13.30 Zajaŭniki panieśli ŭ parlament zvarot na imia Sidorskaha. Kolkaść udzielnikaŭ pavialičyłasia da 800-1000 čałaviek.
13.50 Staršynia Stałaj kamisii PPNS RB pa pramysłovaści, paliŭna-enerhietyčnym kompleksie, transparcie, suviazi i pradprymalnictvie Anatol Paŭłovič prapanavaŭ pradprymalnikam sustrecca ŭ nastupnuju sieradu ŭ pašyranys składzie i razhledzieć hetyja pytańni. Delehaty ad pradprymalnikaŭ, jakija pieradavali zvarot, paprasili ŭ prysutnaści žurnalistaŭ harantyi ŭ čynoŭnikaŭ i milicyi, što ludziam daduć razyccisia biaz aryštaŭ. U natoŭpie pad 1000 čałaviek. Ludzi skandujuć ekanamičnyja lozunhi.
14.00 Aktyvist ruchu «Za volnaje raźvićcio pradprymalnictva» Alaksandar Taŭstyka, adzin z zajaŭnikaŭ akcyi, jaki za razdaču materyjałaŭ da akcyi adsiedzieŭ 7 sutak na Akreścina, kaža: što takaja kolkaść ludziej — vialiki pośpiech dla akcyi.
Anatol Labiedźka zajaviŭ, što pryjšoŭ na akcyju jak spažyviec, bo hetaja prablema nia tolki pradprymalnikaŭ, ale i ŭsich spažyŭcoŭ, i palitykaŭ-spažyŭcoŭ u pryvatnaści.
14.08 Delehaty ad pradprymalnikaŭ vyjšli z parlamentu. Ich zvarot pryniaty da razhladu. Na nastupnuju sieradu zaplanavanaja sustreča z čynoŭnikami. Taksama jany atrymali vusnaje abiacańnie, što ludziam daduć razyścisia biez zatrymańniaŭ. Jašče adnoj umovaj pradprymalnikaŭ było vyzvalić čatyroch zatrymanych pierad akcyjaj i ŭ časie jaje: Alaksandra Cacoru, Alaksandra Makajeva, Volhu Kazulinu j Barysa Hareckaha.
Ludzi pacichu pačynajuć razychodzicca.
Kamientary