Jak stała viadoma «Našaj Nivie», niekalki dzion tamu zatrymali biełaruskaha bajca bataljona «Azoŭ», 20-hadovaha viciebčuka Stasa.
Hetuju infarmacyju paćvierdzili ŭ «Azovie».
Proźvišča Stasa mała kamu viadomaje, u «Azovie» jon słužyŭ pad pazyŭnym «Biełarus» i nie afišavaŭ siabie, nie davaŭ intervju.
Ale siarod sasłužyŭcaŭ mieŭ vialiki aŭtarytet praz svaju bieskampramisnaść.
«Jon zaŭsiody byŭ na pieradavoj, bieskampramisny, śmieły», — tak nam jaho apisali ŭ «Azovie».
«Jon źbiraŭsia jechać u Biełaruś, kazaŭ, što jamu tut usio abrydła, choć i kiravaŭ tut uzvodam maładych. Kazaŭ, maŭlaŭ, ja nie mahu, jak chaču dachaty. Jaho adhavorvali, kaniečnie, kazali: tabie ž kaniec tam. Ale jon, moža, dumaŭ, što jaho nie paznajuć i nie pasadziać. I praŭda, dni čatyry jon vychodziŭ na suviaź ź Biełarusi, a potym usio, źnik. Jašče praź dzień paviedamiŭ, što jaho «pryniali», i ŭsia infarmacyja, jakaja moža iści ciapier ad jaho imia, budzie pravakacyjaj», — raspaviali nam taksama ŭ «Azovie».
Darečy, minułym letam, padčas razmovy z karespandentam «Našaj Nivy», instruktar trenirovačnaj bazy «Azova» z pazyŭnym «Ivanoŭ» uzhadvaŭ pra «Biełarusa», adznačajučy, što toj staŭ lehiendaj u bataljonie.
«Taksama ciapier na ŭschodzie vajuje chłopiec z vašych, nie pamiataju pazyŭny, — apisvaŭ jaho «Ivanoŭ». — Karaciej, jon vybiŭ sabie na hałavie tatuiroŭku «Teror-mašyna» i navodzić žach na «sieparaŭ». Chłopcy kazali, što padčas boju ŭ Šyrokinie armija adstupała i pakinuła bojekamplekt. Dyk kali «Azoŭ» nastupaŭ, to hety biełarus niekalki tysiač patronaŭ adzin vystralnuŭ, adciahvajučy na siabie ahoń «sieparaŭ», pakul našyja ich z bakoŭ abychodzili. Potym pałonnyja kazali, što jany dumali, što tam čałaviek 10 pa ich stralaje — tak chutka «teror-mašyna» pazicyi mianiaŭ. Pry hetym jamu hadoŭ 20, zdajecca».
Sa staronki «Biełarusa» «UKantakcie» vynikaje, što toj prytrymlivaŭsia nieanacysckich pohladaŭ.
Na hrudziach u jaho nabita 88 — heta ličbavaja abrevijatura, jakaja aznačaje «Chajl Hitler».
Ź inšaha boku — hierb asablivaha bataljonu SS «Dzirlevanhier».
Za časami Treciaha Rejchu ŭ hety bataljon nabirali złačyncaŭ-recydyvistaŭ naŭprost z turmaŭ.
Na terytoryi Biełarusi bajcy SS «Dzirlevanhier» vyłučalisia krajniaj žorstkaściu, uziaŭšy ŭdzieł u dziasiatkach karnych apieracyj.
U pryvatnaści, mienavita SS «Dzirlevanhier» pravodziŭ apieracyju «Čaroŭnaja flejta», metaj jakoj było «zabić volu da supracivu» ŭ minčukoŭ i vyvieźci dužejšych na prymusovyja raboty ŭ Hiermaniju.
Aproč taho, u «zasłuhach» hetaha bataljonu — tysiačy žyćciaŭ biełarusaŭ.
SSaŭcy «Dzirlevanhiera» vyrazali ŭ Zachodniaj i Centralnaj Biełarusi cełyja vioski, spalvajučy žycharoŭ.
Łazaraŭ Bor, Hłuchoje Piarchurava, Lubažanka, Vałkoŭščyna, Podar: hetyja i dziasiatki inšych miastečak nie padnialisia z popiełu praź źvierstvy tych, chto na svaich kicielach nasiŭ toj ža samy znak, što i 20-hadovy Stas na svajoj skury.
Aproč taho, «UKantakcie» azoviec «Biełarus» maje niknejm suhučny ź imiom adnaho z bryhadefiureraŭ SS.
Pakul nieviadoma, jakoje abvinavačvańnie jamu moža być vysunuta.
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich2020
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich20
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary