Deputata Viarchoŭnaj Rady Ukrainy Ihara Huzia nie puścili ŭ Biełaruś

Ihar Huź jechaŭ z pamočnikami ŭ Miensk, kab uziać udzieł u akcyi «Čarnobylski šlach». Akramia taho, planavalisia sustrečy z supracoŭnikami ambasady Ŭkrainy, pradstaŭnikami ŭkrainskaj dyjaspary i apazycyjnych sił.

Pavialičyć

«Łukašenka znoŭ nie puściŭ mianie ŭ Biełaruś. Na hety raz na zahad Kramla. Taksama ja damoviŭsia ab sustrečy z baćkami asobnych biełaruskich dobraachvotnikaŭ, jakija vajujuć za Ŭkrainu na Danbasie. Niadaŭna ŭ kvaterach, dzie pražyvajuć svajaki chłopcaŭ, prajšli pieratrusy. Prosta nieabchodna ich padtrymać», — paviedamiŭ Huź u fejsbuku.

Aŭtamabil Ihara Huzia spynili na miažy pamiežniki, dalej padciahnulisia rabotniki KDB i inšych orhanaŭ.

«Ja praciahvaju być asabliva niebiaśpiečnym dla Łukašenki i, vierahodna, ŭžo i dla Pucina palitykam».

Biełaruskija pamiežniki pastavili štamp u pašpart narodnaha deputata Ŭkrainy Ihara Huzia, što jon nieŭjazny ŭ Respubliku Biełaruś, i prymusili pakinuć prapuskny punkt. Narodny deputat vymušany byŭ viarnucca va Ŭkrainu.

Ihar Huź adkazaŭ na pytańni karespandenta Svabody.

— Na jaki termin vam zabaronieny ŭjezd u Biełaruś i pa jakoj pryčynie?

— Ja prasiŭ dać mnie papieru pra toje, na kolki času mnie zabaronieny ŭjezd na terytoryju Biełarusi. Ale jany patłumačyli, što nia majuć prava davać mnie takuju papieru, — prosta ŭjezd zabaronieny. Skazali, kab ja źviartaŭsia ŭ ambasadu Rasiei, a nie Biełarusi, kab daviedacca, na jaki čas mnie zabaronieny ŭjezd.

— Čamu źviartacca ŭ ambasadu Rasiei, jany heta niejak patłumačyli?

— Biełaruskija pamiežniki, tam byli taksama supracoŭniki KDB, ćvierdzili, što mianie nie puskajuć u Biełaruś pa patrabavańni Rasiejskaj Federacyi. Što jość papiera, što ja niepažadanaja asoba ŭ RF. A adpaviedna, ja tak razumieju, z-za miždziaržaŭnych damovaŭ pamiž Rasiejaj i Biełaruśsiu mianie nie puścili ŭ Biełaruś. Va ŭsialakim razie takaja infarmacyja hučała ad biełaruskich pamiežnikaŭ.

— Vam užo zabaraniali ŭjezd u Biełaruś?

— Tak, u 2005 hodzie ja byŭ departavany z zabaronaj ujezdu na 5 hadoŭ. Ja tady braŭ udzieł u akcyi «Čarnobylski šlach» i adsiedzieŭ u mienskaj turmie na Akreścina 10 sutak. My trymali haładoŭku. Ale ŭžo hety termin vyjšaŭ, prajšło 11 hadoŭ ad taho času. Nu, voś nastupny krok.

— Jak vy prakamentujecie hetuju sytuacyju i što budziecie rabić ciapier?

— Vysnova adna. Łukašenka, jak i Pucin, baicca ludziej, jakija majuć svaju pazycyju va Ŭkrainie. Ja nia budu chavać, što maju adnosiny da stvareńnia va Ŭkrainie atradu «Pahonia» ź biełaruskich dobraachvotnikaŭ, jakija vajavali i vajujuć na Danbasie za ŭkrainskija intaresy. Tamu Łukašenka pakazvaje, što jon baicca ludziej, jakija majuć svaju pazycyju. Ja budu damahacca ŭ MZS, kab jany vysłali notu pratestu. Bo ja faktyčna namieśnik kiraŭnika kamitetu zamiežnych spraŭ, i ja jechaŭ, vykonvajučy svaje abaviazki jak narodny deputat dziela naładžvańnia suviaziaŭ. Ja mieŭ peŭnyja plany ŭ Miensku. I tamu takija dziejańni niedapuščalnyja. Ja liču, što MZS i Viarchoŭnaja rada Ŭkrainy pavinny na hetuju sytuacyju adreahavać.

— Vy źbiralisia brać udzieł u «Čarnobylskim šlachu» ŭ Miensku?

— U mianie była zaplanavana sustreča ŭ ambasadzie z ukrainskimi dyplamatami i pradstaŭnikami dyjaspary. Ja damaŭlaŭsia pra sustreču z Paŭłam Sieviaryncam, Źmitrom Daškievičam, Mikołam Statkievičam, Uładzimieram Niaklajevym, Anatolem Labiedźkam. To bok faktyčna ź liderami apazycyi. Mnie było cikava pačuć ichniaje bačańnie sytuacyi va Ŭkrainie i ŭ Biełarusi. U nas planavałasia pres-kanferencyja ŭ Miensku. Vidać, KDB viedaŭ pra heta, tamu dziejničaŭ takim čynam.

— Jak vy staviciesia da pieraśledu ŭ Biełarusi dobraachvotnikaŭ, jakija vajavali na baku Ŭkrainy, i ci budziecie vy ich dalej abaraniać?

— Kaniečnie, my ciapier robim usio mahčymaje, kab byŭ maratoryj na ekstradycyju hetych chłopcaŭ, kab u Biełaruś jany nie viartalisia, bo ŭžo jość takija zapyty. Nu a dalej praces nadańnia hramadzianstva tym, chto choča, abo vidu na žycharstva va Ŭkrainie. Ja budu jašče bolš ščylna zajmacca ciapier hetymi pytańniami, bo vymušajuć abstaviny i pazycyja biełaruskich uładaŭ.

— A ci musić Ukraina davać niejki symetryčny adkaz Biełarusi, kali ŭ Biełaruś nie puskajuć ukrainskich deputataŭ?

— Hetaje pytańnie pavinna vyrašacca na ŭzroŭni MZS. Ja dumaju, što napeŭna jość ludzi, jakija niepažadanyja va Ŭkrainie. Ja dumaju, što adkaz pavinien być.

***

U 2005 hodzie paśla ŭdziełu ŭ «Čarnobylskim šlachu» Ihar Huź, jaki na toj čas uznačalvaŭ ukrainskuju arhanizacyju «Nacyjanalny aljans», a taksama čaćviora jaho paplečnikaŭ byli zatrymanyja i pakaranyja 9 sutkami aryštu na Akreścina. Uvieś hety termin ukrainskija aktyvisty trymali haładoŭku. Paśla vyzvaleńnia z turmy Ihara Huzia departavali ź Biełarusi, pazbaviŭšy prava ŭjezdu ŭ krainu na 5 hadoŭ.

• 0
• 0
• 0
• 0
• 0
• 0
• 0
• 0