OPEC zaklučyła pakt z Rasijaj, a Tramp atačaje siabie pradstaŭnikami naftavaha łobi

U subotu ŭ Vienie adbyłasia padzieja, jakaja moža być vyznačalnaj dla ekanomiki i palityki Rasii i Biełarusi na nastupnyja hady. Upieršyniu za 15 hadoŭ krainy OPEC i niekatoryja dziaržavy, što nie ŭvachodziać u kartel eksparcioraŭ nafty, dasiahnuli pahadnieńnia pra abmiežavańnie zdabyčy syraviny.

OPEC źniźnić zdabyču na 1,2 młn baralaŭ za dzień. Z hetaha 0,486 młn biare na siabie Saudaŭskaja Aravija. U svaju čarhu, krainy z-pa-za OPEC abmiažujuć zdabyču na 0,558 młn baralaŭ. Ź ich 0,3 młn prypadzie na dolu Rasii.

Da pahadnieńnia dałučyŭsia i Kazachstan, jaki taksam abmiažuje svajo pampavańnie na 0,02 młn baralaŭ za dzień.

Nie mienš važnaje značeńnie dla rynku maje toj fakt, što novaabrany prezident ZŠA atačaje siabie pradstaŭnikami «naftavaha łobi». Jak miarkujecca, naftavik abo pradstaŭnik naftazdabyvajučych štataŭ zojmie pasadu ministra enierhietyki. Pry papiarednich administracyjach hetuju pasadu zajmali vybitnyja navukoŭcy, a bolšaja ŭvaha nadavałasia atamnaj enierhietycy i alternatyŭnym krynicam enierhii.

Naftavik moža zaniać i post dziaržaŭnaha sakratara ZŠA — kiraŭnika zamiežnapalityčnaha viedamstva. Mahčyma, im stanie Reks Tylersan, jaki doŭhi čas kiravaŭ naftazdabyŭnaj kampanijaj Exxon Mobil, što maje vialikija intaresy ŭ Rasii. Charakterna, što ŭ 2012 hodzie Pucin uznaharodziŭ Tylersana ordenam Družby Narodaŭ. Tylersana nazyvajuć najbolšym siabrom Pucina ŭ ZŠA.

Vybar top-čynoŭnikaŭ Trampam tłumačyć, čamu Rasija tak ekstraardynarna viała ahitacyju za kandydata-respublikanca, suprać Chiłary Klintan. Nahadajem, što ŭ vyniku Klintan, choć i atrymała na 2,5 miljona hałasoŭ bolš u Amierycy ŭ cełym, ale sastupiła niekalki tysiač hałasoŭ u troch klučavych nievialikich štatach i prajhrała.

Značnaj padziejaj apošnich dzion byŭ taksama prodaž častki akcyj rasijskaha naftahazavaha hihanta «Rośniefť». Ich kupili Katar i raźmieščany ŭ Šviejcaryi mižnarodny naftatrejdar «Hlenkor». Ahienctva Rojterz piša, što padrychtoŭku ŭhody kantralavaŭ asabista Uładzimir Pucin.

Upuściŭšy «Hlenkor» u «Rośniefť», Pucin spadziajecca atrymać mahutnaha łabista źniaćcia sankcyj z Rasii.

Palityčna ŭ doŭhaterminovym płanie Kreml chacieŭ by, kab Zachad pahadziŭsia pryznać «zakonnyja intaresy Rasii». Što datyčyć našaha rehijona, to heta prava vyznačać los Ukrainy, Biełarusi, a mahčyma i krain Bałtyi. Kali ž brać ekanomiku, dyk samaje hałoŭnaje dla Rasii — kab ceny na naftu i haz trymalisia na vysokim uzroŭni. Ekspart nafty, hazu i naftaprduktaŭ — heta hałoŭnaja krynica dachodaŭ, nieabchodnych dla finansavańnia dziaržaŭnych vydatkaŭ.

Kroki Trampa i rašeńnie OPEC — Saudaŭskaja Aravija i inšyja manarchii Piersidskaj zatoki heta blizkija sajuźniki Vašynhtona — pakazvajuć, što intaresy Kramla mohuć supadać u hetym ź intaresami budučaj administracyi Biełaha doma.

Biełaruś pa svajoj struktury ekanomiki źjaŭlajecca faktyčna naftavaj krainaj, tolki biez ułasnaj nafty. Hałoŭnuju častku dachodaŭ Biełarusi ad ekspartu ŭ minułyja dziesiacihodździ davała pierapracoŭka subsidyjavanych rasijskich nafty i hazu. Mnohija inšyja haliny ekanomiki zaležać ad pastavak na rasijski rynak, jomistaść jakoha ŭ svaju čarhu zaležyć ad cenaŭ na vuhlevadarody. Tamu biełaruskaja ekanomika ad 2014 hoda razam z rasijskaj pieražyvaje padzieńnie, a pieryjad vysokich cenaŭ na naftu byŭ taksama pieryjadam ekanamičnaha rostu ŭ Biełarusi i, adnačasova, rostu zaležnaści ad Rasii.

U paniadziełak cana fjučarsaŭ na naftu marki Brent upieršyniu z 21 lipienia 2015 hoda pierasiahnuła adznaku 57 dalaraŭ za baral.

• 0
• 0
• 0
• 0
• 0
• 0
• 0
• 0