Jadviha Papłaŭskaja ab pretenzijach Chanka: Paśla jaho vizitu było žadańnie paŭźci na Maskoŭskija mohiłki i tam zakapacca
Znakamityja artysty vykazalisia z nahody pretenzij da ich kampazitara Eduarda Chanka i jaho zabarony na vykanańnie 5 piesień jaho aŭtarstva, piša kp.by
U pryvatnaści, narodnaja artystka Biełarusi Jadviha Papłaŭskaja raspaviała «Kamsamołcy»:
— Kali Edzik patelefanavaŭ i skazaŭ, što jamu treba sa mnoj surjozna pahavaryć, ja navat była jamu ŭdziačnaja, što pačakaŭ, pakul projdzie 40 dzion pa Sašy. Ja navat vykazać zdahadku nie mahła, pra što jon choča parazmaŭlać. Dumała — moža novuju pieśniu prapanavać dla mianie ci Naści. Zaŭsiody ličyła jaho našym siabram, my sustrakali jaho z abdymkami, stoł nakryvali… A jon zavioŭ razmovu ab tym, što pamianiałasia try hady tamu zakanadaŭstva, i ciapier treba inakš płacić za pieśni. Ja spytała: kolki? U nadziei, što nazavie, moža, sumu ŭ $1000. Ja nie płačusia, ale daliboh, u mianie zaraz i hetych hrošaj niama. Vielmi šmat pajšło na leki Sašy, usie našy aščadžeńni. Bačyli b vy, u jakim stanie jon dapracoŭvaŭ apošnija kancerty — heta jaho, moža, i padkasiła kančatkova. U nas nie było vyjścia, Saša sam razumieŭ, što hrošaj na leki ŭžo nie zastałosia. Nu ŭvohule, nie pra toje ciapier havorka …
Kali Edzik nazvaŭ sumu ŭ 25 tysiač dalaraŭ, mianie ledź infarkt nie dzieŭbanuŭ.
Jon skazaŭ: «Kali na praciahu miesiaca ty nie vykanaješ maje ŭmovy, ja budu vymušany padavać u sud». Ja i da hetaha płakała dalej niama kudy … A paśla takoha pavarotu ŭ mianie byŭ stan, što tolki paŭźci na Maskoŭskija mohiłki i tam zakapacca.
Edzik skazaŭ: «Ja žorstki, ale spraviadlivy. Saładucha taksama płakaŭ, kali ja skazaŭ jamu pra hrošy — ale zapłaciŭ».
***
Nahadajem, što kampazitar Eduard Chanok nakiravaŭ ministru kultury Barysu Śviatłovu i ministru infarmacyi Lilii Ananič list, u jakim adznačajecca:
«Chaču paviedamić Vam ab tym, što ŭ suviazi z hrubymi parušeńniami maich aŭtarskich pravoŭ i budučymi sudovymi razhladami z Anatolem Jarmolenkam i duetam Cichanovič-Papłaŭskaja, ja, jak uładalnik vyklučnych pravoŭ, apaviaściŭ ŭsie radyjo i telekanały Respubliki Biełaruś ab zabaronie z 26 krasavika 2017 hoda vykarystańnia jak u aŭdyjo, tak i ŭ televizijnym varyjantach muzyki nastupnych maich tvoraŭ (piesień):
1. «Vy šumicie, biarozy» (słovy Niła Hileviča).
2. «Sčastlivyj słučaj» (słovy Łarysy Rubalskaj).
3. «Ja u babuški živu» (słovy Ihara Šafierana).
4. «Zavirucha» (słovy Hienadzia Buraŭkina).
5. «Malinovki zasłyša hołosok» (słovy Anatola Papiarečnaha).
Hetaja zabarona taksama datyčycca ŭsich masavych mierapryjemstvaŭ, uklučajučy Maładziečanski fiestyval, a taksama «Słavianski bazar» u Viciebsku.
Ab adnaŭleńni vykarystańnia dadzienych tvoraŭ (piesień) ja paviedamlu dadatkova. U vypadku niemahčymaści ŭrehulavańnia pravavych adnosin z vyšejnazvanymi vykanaŭcami, zabarona stanie kančatkovaj».
Kamientary