«Naša Niva» mianiaje palityku maderacyi kamientaroŭ

Kolkaść kamientaŭ u «NN» raście navat chutčej za kolkaść prahladaŭ. U 2017 hodzie kolkaść prahladaŭ u nas pavialičyłasia na 11% proci 2016 hoda, a kamientaŭ — až na 20%.

U toj ža čas nam pa-raniejšamu składana dabivacca kultury dyskusii. My razumiejem čamu. U Jutubie, Ukantakcie, Tvitary mnohija ludzi pišuć z maciukami, spaborničajuć u abrazach, jakija ŭ tvar nie rašylisia b skazać, bo atrymali b mocny adkaz. I hetyja zvyčki ludzi pieranosiać na naš sajt.

Dla nas heta nieprymalna. Biełaruś tady budzie mocnaja, kali jana budzie kulturnaja. Kultura abaraniaje nacyi lepš za lubuju zbroju.

Naš maderatar starajecca jak moža, ale raniejšyja mietady nie pracujuć, bo vał kamientaŭ zavialiki. My vyrašyli pajści na radykalnyja miery. Jany, mahčyma, pavysiać dolu kamientaŭ, jakuju my budziem vydalać, ale hrazi stanie mienš.

Abo trymajciesia našych pravił, abo pišycie ŭ inšym miescy. My bolš nie budziem vyšukvać u kamiencie słova «mraź», vydalać jaho, šukać nastupnaje nieprymalnaje słova, a paśla kamient prymać. Taki kamient budzie vydalacca całkam, i da pabačeńnia.

Jość kamientatary, u jakich kožny druhi kamient parušaje praviły. My bolš nie majem mahčymaści adździalić žyta ad pustaziella. Kali niejki kamientatar parušaje nie raz, usie jahonyja kamienty buduć vydalacca aŭtamatam.

Ciapier my časta pišam «Red. Vydalena», kab pakazać čałavieku, što toj jahony kamientar parušaje normy zakona ci marali. Zaraz my pieravažna budziem prosta vydalać, nie marnujučy čas na napisańnie paznaki.

Praviły kamientavańnia

Nie buduć prymacca nastupnyja vykazvańni:

1. Kamienty, jakija ŭtrymlivajuć nienarmatyŭnuju leksiku i nieprystojnaści.
2. Kamienty, jakija ŭtrymlivajuć turemny žarhon.
3. Kamienty, što ŭtrymlivajuć mižnacyjanalnyja, mižrelihijnyja dy inšyja vypady, taksama tyja, u jakich ź niehatyvam padkreślivajecca pachodžańnie ci nacyjanalnyja tradycyi, u jakich zamiest samanazovaŭ nacyj vykarystoŭvajucca mianuški (bulbašy, maskali, chachły, śviadomyja, rahuli, pšeki, vatniki i h.d.).
4. Kamienty, jakija staviać pad sumnieŭ prava biełarusaŭ na ŭłasnuju kulturu, movu, dziaržavu, a taksama ksienafobskija kamientary.
5. Kamienty, u jakich vykazvajecca radaść z nahody zaviedama trahičnych padziej: śmierciaŭ, avaryj, katastrof.
6. Kamienty, u jakich pierakručvajucca, abyhryvajucca imiony i proźviščy.
7. Kamientary, jakija ŭtrymlivajuć zaŭvahi pra fizičnyja niedachopy ludziej — krytykujcie ŭčynki, a nie vyhlad (atłuścieły, pierakošanaja i h.d.).
8. Kamienty, jakija ŭtrymlivajuć zakliki da hvałtu ci samasudu.
9. Kamienty, jakija ŭtrymlivajuć paraŭnańni ludziej ci arhanizacyj z nacystami.
10. Kamienty, jakija ŭtrymlivajuć dadumki pra intymnaje žyćcio hierojaŭ publikacyi.
11. Kamienty, u jakich pravodzicca paraŭnańnie ludziej z žyviołami, jakija zaviedama majuć niehatyŭnuju kanatacyju: arłom nazyvać možna, šakałam ci baranam — nie.
12. Kamienty, u jakich ludziej nazyvajuć złačyncami, pakul heta nie dakazana sudom.
13. Naŭprostavyja i inšaskazalnyja pažadańni śmierci, pakutaŭ ci fizičnych kalectvaŭ.
14. Kamienty, u jakich abjekty, źjavy ci ŭčynki paraŭnoŭvajucca z pracesami čałaviečaj fizijałohii, dzie jość usiakija analnyja i fiekalnyja asacyjacyi.
15. Kamienty, skiravanyja suprać «Našaj Nivy» ci asoby aŭtara. Aceńvajcie artykuł, a nie aŭtara.
16. Biessensoŭnyja kamienty, fłud, spam.
17. Nieapraŭdana doŭhija kamienty ci cytavańni. Jany mohuć vydalacca prosta tamu, što maderataru niama kali ich vyčytvać.
18. Rekłamnyja paviedamleńni i kamienty, jakija staviać svajoj metaj tolki rekłamu tych ci inšych pierson, arhanizacyj, partyj, ruchaŭ. Hipierspasyłki na inšyja sajty (my, jak praviła, nie majem mahčymaści praviarać, što tam).
19. Kamienty, jakija ŭtrymlivajuć asabistuju infarmacyju (adrasy, telefony, inšyja kantaktnyja źviestki).
20. Sprečki z maderatarami, parady i abmierkavańnie rašeńniaŭ maderataraŭ.
21. Apošniaje i samaje hałoŭnaje. Maderatar adciapier budzie mieć prava vydalać kamienty subjektyŭna, prosta za brudny, bieskulturny ton.

Kali vam zdajecca, što vyšejšyja praviły nie dazvalajuć napoŭnicu vykazać vašaje mierkavańnie, to ŭspomnicie pra mahčymaść padzialicca materyjałam u sacyjalnych sietkach — na ŭłasnaj staroncy vy možacie pisać što chočacie.

Svaboda słova — jana jak žyvaja vada. Davajcie nie brudzić krynicu, ź jakoj pjom.

• 1
• 0
• 1
• 0
• 1
• 0
• 0
• 0