2 vieraśnia ŭ Rakavie, u 30 kiłamietraŭ na zachad ad Minska, u treci raz projdzie fiestyval kultur «Rakaŭski fest».
Rakaŭ — polikulturnaje miastečka. Zdaŭna tut ciesna pieraplecieny kultury roznych narodaŭ, jakija na praciahu mnohich stahodździaŭ mirna i plonna razam pracavali i adpačyvali. Asablivaha roskvitu Rakaŭ dasiahnuŭ u 30-ja hady minułaha stahodździa, kali apynuŭsia na pamiežžy Polščy z SSSR, i navat atrymaŭ nieaficyjny status «stalicy kantrabandystaŭ».
U prahramie fiestyvalu: vystupleńni kalektyvaŭ z Polščy i Biełarusi, prezientacyja polskaj, biełaruskaj i jaŭrejskaj kultur, vystavy, kirmaš «Horad majstroŭ» i kvest «Ściežkami kantrabandystaŭ», jaki dazvolić akunucca ŭ atmaśfieru Rakava 1930-ch hadoŭ i ŭ poŭnaj miery adčuć na sabie niebiaśpieku i ramantyzm ich žyćcia. Kamanda-pieramožac kvestu atrymaje ŭznaharodu, a dla haściej festu Pit Paŭłaŭ vykanaje niekalki svaich piesien. Kožny zmoža pasprabavać stravy nacyjanalnaj kuchni krain, pradstaŭlenych na fiestyvali.
Z 12 hadzin pačynajem farmiravać hrupy žadajučych bližej paznajomicca ź miastečkam i adpraŭlajemsia na ekskursii pa Rakavu. Upieršyniu ŭ miežach fiestyvalu, na hałoŭnaj płoščy budzie arhanizavany fłešmob «Zatančym razam» i projdzie fota-plener. Lepšyja fota-raboty buduć vyznačany z dapamohaj internet hałasavańnia,a ich aŭtary atrymajuć śpiecyjalnyja ŭznaharody.
Chedłajniery fiestyvalu — «Stary Olsa» (Biełaruś) i «Kapela ze Wsi Warszawa» (Polšča).
Kamientary