«A my praciahvali prymać adpačyvajučych». U infiekcyjoncy pamior supracoŭnik sanatoryja «Praleska» ŭ Ždanovičach
U noč na 2 krasavika pamior supracoŭnik sanatoryja «Praleska», što ŭ Ždanovičach. Jon lažaŭ ź pnieŭmanijaj u rajonnaj balnicy, paśla jaho pieraviali ŭ minskuju infiekcyjonku, kudy nakiroŭvajuć ludziej sa stanoŭčym analizam na karanavirus.
Pa infarmacyi «Našaj Nivy», pamierły Valer Š. pracavaŭ elektrykam, žyŭ u pryharadzie. Jamu było kala 60 hadoŭ.
Niekalki tydniaŭ tamu mužčyna lažaŭ u abłasnoj balnicy, praviaraŭ serca. Paśla vyjšaŭ na pracu, pabyŭ paru źmien. A potym źloh ź pnieŭmanijaj.
U piatnicu, 27 sakavika, jaho pakłali ŭ Minskuju centralnuju rajonnuju balnicu ŭ Baraŭlanach. U sieradu pieraviali ŭ haradskuju infiekcyjnuju balnicu, dzie jaho i nie stała.
«Try dni lažaŭ na kalidory, napeŭna, zapuścili», — narakajuć kalehi pa pracy.
Na nastupny dzień paśla śmierci mužčyny supracoŭnikaŭ sanatoryja paprasili pradastavić śpis kantaktaŭ pieršaha ŭzroŭniu.
U «Pralescy» adpačyvajuć u asnoŭnym pažyłyja. Raniej u dźviuch žančyn z adnaho z zajezdaŭ dyjahnastavali karanavirus, raskazali «Našaj Nivie» supracoŭniki sanatoryja. A praz čas u sanatoryj stali pryjazdžać «chutkija» i zabirać rabotnikaŭ jak kantaktaŭ. Kažuć, siarod ich byli pakajoŭki, aficyjantki, miedyki. Mnohija — va ŭzroście.
«A my praciahvali pracavać i prymać adpačyvajučych», — pieražyvajuć ludzi.
Administracyja sanatoryja kamientavać vypadki karanavirusa ci ich adsutnaść admoviłasia.
«Nu što vy, nie viedajecie artykuł 46 [artykuł ab miedyčnaj tajamnicy zakona ab achovie zdaroŭja]? Nijakaj infarmacyi dać nie mahu. Karancinu ŭ nas niama. Zdraŭnica pracuje ŭ štatnym režymie», — adkazaŭ dyrektar «Praleski» Siarhiej Padkavyraŭ.
Sanatoryj uvachodzić u sistemu chołdynha «Amkador».
Čytajcie taksama: U Minsku ad karanavirusa pamior 60-hadovy inžynier adnaho z sakretnych pradpryjemstvaŭ. U jaho nie było chraničnych zachvorvańniaŭ
Čytajcie taksama: U Viciebsku ad ciažkaj pnieŭmanii pamierła 47-hadovaja miedsiastra. Pieršaja takaja śmierć miedrabotnika
-
17‑hadovy błohier, jaki šykavaŭ na hrošy sa zboru na chvoraje dzicia, znoŭ źbirajecca razyhryvać ajfony
-
Da kanca hoda adkryjecca kaviarnia «Vieža» ŭ minskaj vodanapornaj viežy kala praśpiekta Žukava
-
«Aby chutčej dabracca da mamy». Biełaruski, jakija žyvuć za miažoj, raskazali pra dopyty na biełaruskaj miažy
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary