Jak adna z baptysckich cerkvaŭ stała ačahom karanavirusa ŭ Minsku

«Naša Niva» pisała, što ŭ carkvie jevanhielskich chryścijan baptystaŭ «Śviatło Jevanhiella» 16 krasavika pamior 69-hadovy vachcior i achoŭnik Ihar Piatroŭ. Jahony syn Ihar śćviardžaje, što adnoj z pryčyn śmierci mužčyny stała zachvorvańnie COVID-19.

Pavialičyć

Paśla hetaj publikacyi ŭ «Našu Nivu» źviarnułasia niekalki čałaviek, jakija padzialilisia tym, što adbyvajecca ŭ hetaj carkvie.

Najpierš zaŭvažym, što ź pnieŭmanijaj, a taksama, mahčyma, z karanavirusam u balnicy znachodzicca praśvitar carkvy Pavieł Abraviec. «Naša Niva» dazvaniłasia da śviatara, ale jon skazaŭ, što nie viedaje, z kim razmaŭlaje, tamu paraiŭ pryjechać da jaho ŭ balnicu, niahledziačy na toje, što tudy nie puskajuć.

Doŭhi čas, kali praśvitar užo adčuvaŭ siabie błaha, jon praciahvaŭ chadzić u carkvu. Heta častka jahonaj žyćciovaj fiłasofii: praca i viera pieradusim, a chvaroby adstupiać.

Pavialičyć

Kali spynicca na partrecie Paŭła Abraŭca, to stanuć zrazumiełyja niekatoryja jahonyja pohlady. Jamu 67 hadoŭ, rodam z Łuninieckaha rajona — z toj miascovaści na Paleśsi vyjšła mnostva pratestanckich pastaraŭ, jak i pravasłaŭnych śviataroŭ. Naradziŭsia ŭ siamji viernikaŭ, u baćkoŭ było 11 dziaciej. Praśvitaram u carkvie «Śviatło Jevanhiella» słužyć z dalokaha 1991 hoda.

Heta čałaviek jašče staroj, dysidenckaj zahartoŭki. Pavieł Abraviec prajšoŭ praz čas, kali słužby i abrady byli pad zabaronami. Mienavita tamu siońnia dla jaho važna nie spyniać bohasłužeńni pry lubych abstavinach. Bo pastar užo prajšoŭ praz čas, kali schody viernikaŭ zabaranialisia, tamu jon chvaravita reahuje na mahčymaje časovaje zakryćcio pry lubych umovach. Heta adna z klučavych daktryn Abraŭca.

Pry im «Śviatło Jevanhiella», jakoje raźmieščana ŭ Zavodskim rajonie Minska, stała adnym z najbolš upłyvovych baptysckich asiarodkaŭ Minska. Pry zamiežnaj dapamozie atrymałasia pabudavać hmach na vulicy Rajnisa. Pry carkvie dziejničajuć papularnyja kursy anhlijskaj movy, praź jakija misijaniery z ZŠA i Kanady niasuć Božaje słova. Praz hetyja kursy ŭžo prajšli tysiačy ludziej. Važnym štrychom źjaŭlajecca jakraz toje, što ŭ carkvie šmat ludziej ź inšych krain, jakija stała žyvuć u Biełarusi.

Amal va ŭsich pratestanckich cerkvach, kab nie dapuścić kiravańnia adnaho čałavieka, isnujuć rady, jakija i vyznačajuć žyćcio hramady. Rašeńni prymajucca nie adnaasobna, a kalehijalna. Što tyčycca «Śviatła Jevanhiella», to tut skłałasia dosyć śpiecyfičnaja situacyja, kali «rada nibyta i isnuje, ale ŭpłyŭ jaje prykładna hetki ž, jak Pałaty pradstaŭnikoŭ», kaža adzin z surazmoŭcaŭ «Našaj Nivy».

Simptomy karanavirusa [strata niuchu i smaku, chvalepadobnaje ciačeńnie tempieratury, kašal] naziralisia ŭ mnohich prychadžan carkvy jašče ŭ sakaviku. Viadoma, što Ihar Piatroŭ — heta nie adzinaja śmierć ad karanavirusa ŭ akružeńni carkvy. Ad hetaj ža chvaroby pamior muž pijanistki «Śviatła Jevanhiella». Pry hetym usio ž adznačym, što sam mužčyna nie byŭ členam carkvy.

Pa infarmacyi «Našaj Nivy», na hety momant z karanavirusam ci padazreńniem na jaho špitalizavana niekalki dziasiatkaŭ prychadžan. Niekatoryja ŭžo paśpieli vylečycca.

Pra situacyju ŭ carkvie «Śviatło Jevanhiella» «Naša Niva» raspytała jepiskapa, staršyniu Sajuza Jevanhielskich chryścijan-baptystaŭ Biełarusi Leanida Michoviča. «U mianie niama poŭnaj infarmacyi ab tym, što adbyvajecca ŭ carkvie. Ja viedaju, što tam adbyvajucca i anłajn-bohasłužeńni razam sa zvyčajnymi. Ludzi prychodziać, rabota idzie, carkva adkrytaja. Tak, niechta chvareŭ tam [na karanavirus — «NN»], byli vypadki», — adznačaje Leanid Michovič.

Pavialičyć

Što tyčycca stanu zdaroŭja Paŭła Abraŭca, to Leanid Michovič kaža: «Ja ź im paru dzion tamu havaryŭ, jon byŭ u dobrym stanie. Moža, jon i chvareŭ, — kašlaŭ, tempieratura była, — ale ciapier niakiepska siabie adčuvaje. Cerkvaŭ šmat, ja ŭsiaho nie viedaju, ale, kab niešta było surjoznaje, to byŭ by ŭ kursie».

«Usio, što nieabchodna pravodzili. I dezynfikujuć, i myjuć. Usie cerkvy atrymali rekamiendacyi ad Ministerstva achovy zdaroŭja. Tam abaznačana, što treba rabić, jak pravodzić schody. Dastatkova šmat cerkvaŭ pierajšli na čas u anłajn», — kaža Michovič.

Jon pryznaje, što kožnaja carkva sama prymaje rašeńnie ŭ siońniašnich umovach, jak joj siabie pavodzić. «Kali ŭmovy dazvalajuć, normy vykonvajucca, to schody pravodziacca». Pra vypadak sa śmierciu vachciora Ihara Piatrova kiraŭnik sajuza JECHB čuŭ. «Kaniečnie, heta redki vypadak, usie čuli», — pryznajecca jon.

• 0
• 0
• 0
• 0
• 0
• 0
• 1
• 0