Pamior achoŭnik minskaj baptysckaj carkvy, u jaho byŭ karanavirus. Słužby praciahvajucca
16 krasavika pamior 68-hadovy minčuk Ihar Piatroŭ. Syn pamierłaha kaža, što ŭ baćki byŭ dyjahnastavany karanavirus.
Ihara Piatrova zabrali ŭ 10-ju balnicu Minska z dvuchbakovaj pnieŭmanijaj 1 krasavika.
«3 krasavika ŭ jaho paćvierdziŭsia dyjahnaz COVID-19», — kaža jahony syn Ihar.
«Spačatku jon lažaŭ u hastraenterałahičnym adździaleńni ŭ zvyčajnaj pałacie, nie ŭ karancinnaj zonie. Składana zrazumieć: heta poŭnaja biesturbotnaść abo niedachop resursaŭ dla izalacyi takoha rodu chvorych…», — adznačaje Ihar.
4 krasavika mužčynu pieraviali ŭ reanimacyju, jaho padłučyli da aparata štučnaj vientylacyi lohkich. «Pakul karanavirus akazvajecca macniejšym za tatu i ŭsich daktaroŭ, jakija za jaho zmahajucca», — pisaŭ Ihar u sacyjalnych sietkach. Praz 12 dzion znachodžańnia na aparacie baćka pamior.
«U taty nie było nijakich surjoznych chraničnych zachvorvańniaŭ», — adznačaje syn.
Ihar Piatroŭ byŭ indyvidualnym pradprymalnikam u śfiery hruzapieravozak. Kali vyjšaŭ na piensiju, padpracoŭvaŭ vachcioram i achoŭnikam u carkvie «Śviatło Jevanhiella».
Hetaja carkva jevanhielskich chryścijan baptystaŭ znachodzicca ŭ Minsku pa adrasie Rajnisa, 6. Heta vializny hmach niepadaloku ad Traktarnaha zavoda. Minčukam carkva «Śviatło Jevanhiella» znajomaja najpierš za košt biaspłatnych kursaŭ anhlijskaj movy, praź jakija prajšli tysiačy čałaviek. Vierniki carkvy takim čynam sprabujuć nieści Božaje słova. Za nastaŭnikaŭ na kursach nośbity movy z ZŠA i Kanady.
U baptysckim asiarodździ «Śviatło Jevanhiella» maje kansiervatyŭnuju reputacyju.
«Moj tata lubiŭ Boha, 30 hadoŭ tamu pakajaŭsia i chryściŭsia, uvieś hety čas až da śmierci išoŭ za Chrystom, apošni dzień da reanimacyi šmat maliŭsia ŭ balnicy, ležačy na łožku, kali źjaŭlalisia siły — maliŭsia na kaleniach kala łožka. Jon nie bajaŭsia śmierci i byŭ da jaje hatovy.
Heta ŭsiaho tolki pierachod, nie kaniec. Tata sustreŭsia z Chrystom, jakoha lubiŭ, i z usimi, chto pamior u Chryście. Apostał Pavieł skazaŭ: dla mianie žyćcio — Chrystos, a śmierć — nabytak. Moj baćka całkam padzialaŭ hetuju dumku», — adznačaje syn Ihar.
Tym nie mienš słužby ŭ carkvie «Śviatło Jevanhiella» nie byli admienienyja. Byŭ schod u niadzielu, 19 krasavika. Płanujecca i praz tydzień.
Praśvitar carkvy Pavieł Abraviec paraiŭ karespandentu «Našaj Nivy» «nie dastavać jaho» pytańniami. Jon admoviŭsia kazać jak pra pamierłaha prychadžanina, tak i pra toje, čamu słužby ŭ carkvie ŭsio jašče praciahvajucca.
Kamientary