«Ja nie zdajusia». Błohier Piatruchin maluje Bresckuju krepaść, Kabanaŭ trenirujecca z majstram sportu pa šachmatach

Alaksandar Kabanaŭ — siabra Abjadnanaj hramadzianskaj partyi. Staršynia AHP Mikałaj Kazłoŭ paviedamiŭ sa spasyłkaj na svajakoŭ Alaksandra Kabanava, što toj ciapier u viaźnicy ŭ Mahilovie.

«Nazyvajuć adras kalonii № 15 u Mahilovie, što jon ciapier tam. Ci kančatkovaje heta miesca adbyćcia pakarańnia, nia viedajem. Raniej byli źviestki pra jaho, što vyvozili dla niejkich dziejańniaŭ u Bieraście, ale viarnuli ŭ Mahiloŭ. Pra apelacyju nieviadoma, ale naš advakat ź im u kantakcie, kali budzie pryznačana apelacyja, prainfarmuje», — raskazaŭ Mikałaj Kazłoŭ. Jamu nieviadoma, dzie ciapier siabra Kabanava — błohier Siarhiej Piatruchin.

Pra listavańnie ź Siarhiejem Piatruchinym i Alaksandram Kabanavym Svabodzie raskazała žycharka Bieraścia, jakaja prasiła nie nazyvać jaje imia.

«Padabajecca, što jany nie razhubilisia, zachavali siłu ducha, u ichnych listach šmat humaru i aptymizmu. Jany nas zaražajuć enerhijaj, rajać, jak dalej zmahacca suprać akumulatarnaha zavodu, my da ich prysłuchoŭvajemsia», — kaža surazmoŭca pra listy Alaksandra Kabanava i Siarhieja Piatruchina. 

«Ni na što nia skardziacca, prymajuć vyprabavańni mužna. Pra zdaroŭje taksama pišuć, što narmalnaje», — dadaje žančyna. Pavodle jaje, u listach Siarhieja Piatruchina šmat malunkaŭ. Joj asabliva zapomniŭsia malunak Bieraściejskaj krepaści z symbaličnymi słovami «Ja nie zdajusia». «Heta i pra jaho vielmi trapna skazana», — zaŭvažaje žančyna.

Pra Alaksandra Kabanava aktyvistka zhadała, što toj siadzieŭ u kamery razam z majstram sportu pa šachmatach, jaki davaŭ sukamerniku ŭroki majsterstva.

«U adnym ź listoŭ Alaksandar napisaŭ, što nie škaduje, što hetak ź im zdaryłasia, ličyć, što ŭsia Biełaruś prachodzić praz histaryčnaje vyprabavańnie. Zapomnilisia i hetkija jahonyja słovy ź lista: «U krainu iduć pieramieny, i jany zakranuć kožnaha. Škada, što hetyja dumajuć, nibyta hetak zastaniecca nazaŭsiody. Nia vučać historyju — značyć, historyja navučyć ich. A my dapamožam, usie chady zapisanyja (smajlik)», — zhadała surazmoŭca list ad Alaksandra Kabanava.

Pavodle žančyny, apošni list ad Alaksandra Kabanava jana atrymała jašče ŭ sakaviku, a voś Siarhiej Piatruchin apošni raz napisaŭ joj u traŭni. List byŭ adasłany ź viaźnicy ŭ Mahilovie. Žančyna miarkuje, što Siarhiej Piatruchin jašče tam i čakaje apelacyi na prysud.

«Zbolšaha ŭsio narmalna. Čakajem, pakul kamień pakocicca. Na zonu źbirajusia ŭ kancy červienia. Apelacyja jašče nie pryznačanaja, miarkujučy pa ŭsim, budzie ŭ kancy ci siaredzinie červienia. Usim pryvitańnie. Chutka ŭsio skončycca. Heta dakładna», — napisaŭ Siarhiej Piatruchin u liście ad 13 traŭnia.

Pa 3 hady źniavoleńnia i pa 750 rubloŭ hrašovaha spahnańnia Alaksandru Kabanavu i Siarhieju Piatruchinu prysudziła sudździa Kastryčnickaha rajonnaha sudu Mahilova Volha Kraŭčanka. Za pratest błohieraŭ vydalili z sudovaj zali i navat pazbavili prava pramović apošniaje słova.

Błohieraŭ Youtube-kanału «Narodnyj rieportier» Kabanava i Piatruchina asudzili za arhanizacyju biesparadkaŭ i źniavahu pradstaŭnikoŭ ułady. Viny jany nie pryznali. Biełaruskija pravaabaroncy pryznali Alaksandra Kabanava i Siarhieja Piatruchina palitviaźniami.

• 0
• 0
• 0
• 0
• 0
• 0
• 0
• 0