Kryłatyja rakiety z «Iskanderaŭ». Voś čamu Ukraina nie vytrymała b poŭnamaštabnaj vajny z Rasijaj i Biełaruśsiu
Kali Rasija pačnie šyrokamaštabnaje ŭvarvańnie va Ukrainu, jana budzie niejtralizoŭvać ukrainski supraciŭ rakietnymi ŭdarami, jakija ŭkraincam ciažka budzie adbivać, piša Foreign Policy.
Rasija ŭžo adpraviła svaje rakiety vysokaj dakładnaści «Iskander» na liniju frontu. «Iskander» — našmat bolš sučasnaja sistema, čym sastarełaja savieckaja «Kropka», jakimi vałodaje Ukraina. «Iskander» rasijanie mohuć zapuskać z zadniaj častki madyfikavanaha kuzava hruzavika i pracuje kompleks z dakładnaściu da 9 mietraŭ.
Hałoŭnaja niebiaśpieka ad «Iskanderaŭ» dla Ukrainy ŭ tym, što supraćrakietnaja abarona krainy ich nie bačyć i nie moža pierachapić. «Iskander» moža karektavać svoj kurs u palocie i ŭmieje padmanvać supraćrakietnyja kompleksy.
Pavodle acenak Minabarony Ukrainy, Rasija pastaviła 36 sistem balistyčnych rakiet siaredniaj dalokaści «Iskander» pablizu miažy z Ukrainaj, u tym liku i ŭ Biełarusi, niekatoryja ź ich zdolnyja dabivać i da Kijeva.
Kompleksy «Iskander» mohuć stralać jak balistyčnymi, tak i kryłatymi rakietami, i ekśpierty ličać, što Rasija zdolnaja imi paśpiachova prabić ukrainskuju supraćpavietranuju abaronu. U toj ža čas ukraincam likvidavać «Iskandery» krajnie składana, bo ich prykryvajuć rasijskija kompleksy supraćpavietranaj abarony S-400.
«Iskandery razburalnyja, kali ich pravilna vykarystoŭvać, — kaža Dara Masikot, ekśpiert pa Rasii i staršy navukovy supracoŭnik RAND Corporation. — Imi buduć bić pa takich abjektach, jak aeradromy i vajskovyja bazy».
«Iskandery» stanoviacca jašče bolš niebiaśpiečnymi i razburalnymi, kali ich vykarystoŭvać u źviazcy z samachodnymi reaktyŭnymi sistemami załpavaha ahniu BM-27 «Urahan» i ahniamiotnymi sistemami TOS-1, jakija mohuć być ustanoŭlenyja na karkasie tanka.
Takaja rasijskaja stratehija viadzieńnia vajny maje daŭniuju historyju. Jašče pierad Druhoj suśvietnaj vajnoj savieckija hienierały raspracavali taktyku «Hłyboki boj».
ZŠA taksama vykarystoŭvali «Hłyboki boj» u niekatorych svaich apieracyjach, naprykład, padčas pieršaj vajny ŭ Piersidskim zalivie. Padčas toj vajny ŭ Iraku ŭ 1991 hodzie Złučanyja Štaty nanosili vysokadakładnyja ŭdary z pavietra i razam z samachodnaj artyleryjaj i reaktyŭnymi sistemami załpavaha ahniu źniščyli bolšuju častku tankavych vojskaŭ Sadama Chusejna za ličanyja dni.
Rasija pačała vyrablać vysokadakładnuju zbroju tolki na pačatku 2000-ch hadoŭ, paśla taho, jak dobryja adnosiny pamiž Kramlom i Zachadam istotna sapsavalisia. «Iskander» upieršyniu pastupiŭ na ŭzbrajeńnie ŭ 2006 hodzie, a jaho madernizavanyja ŭzory — u 2012 hodzie.
U adroźnieńnie ad NATA, jakoje robić staŭku na vysokadakładnyja ŭdary avijacyi, rasijanie vykarystoŭvajuć vysokadakładnyja mabilnyja artyleryjskija sistemy, takija jak «Iskander», a jany ŭžo majuć rasčyścić darohu suchaputnym siłam. Rasija istotna madernizavała svaje Uzbrojenyja siły ŭ siaredzinie 2010-ch hadoŭ. Mnohija rasijskija sistemy lepšyja za tyja, što jość na ŭzbrajeńni amierykancaŭ.
«Heta daje im realnuju pieravahu, jany mohuć stralać i z terytoryi Rasii, i z karabloŭ u Azoŭskim mory. Možna bić pa kamandnych punktach i transpartnych vuzłach u hłybini Ukrainy. Heta vielizarnaja pieravaha», — kaža Bien Chodžes, były kiraŭnik siłaŭ amierykanskaj armii ŭ Jeŭropie.
Rasija nieadnarazova pierakidvała «Iskandery» ŭ Kalininhrad, adkul jany mohuć nanosić udary pa siłach NATA.
Ale Pientahon chvaluje nie tolki ahniavaja moc «Iskanderaŭ», ale i toj fakt, što Amieryka i jaje sajuźniki, zdajecca, bolš nie daminujuć u niebie.
Kamientary