U Breście asudzili dvuch lekaraŭ pa «spravie artapiedaŭ»

Andrej Varanovič pracavaŭ zahadčykam adździaleńnia z 2016 hoda. Lekara abvinavačvajuć u tym, što jon prapanoŭvaŭ pacyjentam pratezy Waldemar Link, jakija ŭ Biełaruś pastaŭlała adzinaja kampanija — «Miedlink».

Zakupka pry hetym prachodziła ŭ adpaviednaści z usimi praviłami i pracedurami. Adnak, zhodna z abvinavačańniem, pieryjadyčna śpiecyjalist firmy «Miedlink», kali pryvoziŭ u balnicu pratezy, pieradavaŭ Varanoviču hrošy ad dyrektara firmy jak padziaku za vybar ich firmy. Suma niezakonnych uznaharod skłała 6100 jeŭra.

Lekar paśla zatrymańnia napisaŭ jaŭku z pavinnaj. Padčas śledstva jon kampiensavaŭ u kaznu sumu atrymanaha ŭznaharodžańnia, a taksama pieraličyŭ u dachod dziaržavy jašče 25 537 dalaraŭ. Na sudzie mužčyna zajaviŭ pra raskajańnie ŭ zroblenym.

Sud pryznaŭ Varanoviča vinavatym u atrymańni niezakonnaha ŭznaharodžańnia (častka 1 i 2 artykuła 433 KK). Uličvajučy źmiakčalnyja abstaviny: raskajańnie, sadziejničańnie śledstvu, vypłatu złačynnaha dachodu, «dziejańni, nakiravanyja na zahładžvańnie škody, u vyhladzie pieraličeńnia ŭ biudžet hrašovych srodkaŭ», — a taksama adsutnaść raniejšych sudzimaściaŭ, dobryja charaktarystyki, vysoki prafiesijanalizm i kaštoŭnaść jak śpiecyjalista, jamu pryznačyli 2,5 hoda abmiežavańnia voli biez nakiravańnia ŭ papraŭčuju ŭstanovu adkrytaha typu. Pry hetym hod źniali pa amnistyi da Dnia narodnaha adzinstva. U vyniku lekaru zastałosia adbyć 1,5 hoda «chatniaj chimii».

60-hadovy Siarhiej Kisiel — lekar vyšejšaj katehoryi. 26 sakavika 2022 hoda ŭ jaho byŭ apošni pracoŭny dzień, bo jamu nie praciahnuli kantrakt, i jon raźvitaŭsia z kalektyvam. U hety ž dzień jaho zatrymali. Krychu bolš za miesiac jon pravioŭ u SIZA.

Abvinavačańnie Kisialu praktyčna takoje ž, jak i Varanoviču: u 2019—2022 hadach prapanoŭvaŭ pacyjentam pratezy Waldemar Link. Pavodle abvinavačańnia, za hety pieryjad Kisiel atrymaŭ ad dyrektara «Miedlink» i pradstaŭnika firmy sumarna nie mienš za 25 400 jeŭra ŭ jakaści ŭznaharodžańnia za sadziejničańnie. Paśla zatrymańnia lekar napisaŭ jaŭku z pavinnaj. Padčas śledstva jon vypłaciŭ u biudžet uvieś niezakonny dachod, a na sudzie pryznaŭ svaju vinu ŭ atrymańni hrošaj.

Kisiala pryznali vinavatym u pryniaćci niezakonnaha ŭznaharodžańnia paŭtorna i ŭ asabliva bujnym pamiery (častka 2 i 3 artykuła 433 KK). Z ulikam raskajańnia, vypłaty hrošaj i sadziejničańnia śledstvu jamu vyrašyli dać adterminoŭku pakarańnia. Sud pryznačyŭ mužčynu 4 hady pazbaŭleńnia voli z adterminoŭkaj na dva hady. Pry hetym lekaru dali štraf u pamiery 22 200 rubloŭ.

Pra «spravu artapiedaŭ» ci «spravu traŭmatołahaŭ» stała viadoma viasnoj minułaha hoda. U jaje ramkach KDB kašmaryŭ artapiedaŭ pa ŭsioj respublicy. Paśla zastupnictva ministra achovy zdaroŭja Pinieviča i daručeńnia Łukašenki «ŭziać na paruki» zatrymanych tym vystavili drakonaŭskija ŭmovy vychadu.

Jak stała viadoma «Našaj Nivie», abvinavačanym pa spravie byŭ vystaŭleny dziesiacikratny multyplikatar ad «naniesienaj škody»: u kahości suma vykupu pieravyšaje sotniu tysiač dalaraŭ.

«Niechta, kab raźličycca, vymušany byŭ pradać kvateru, niechta — niedabudavany dom. Tyja, chto nie pryznaŭ vinu i nie spłaciŭ škody, pa-raniejšamu siadziać. Adkaz na pytańni rodnych kožny dzień ad śledčych adzin: «Źbirajcie hrošy», — kazali raniej «Našaj Nivie» abaznanyja surazmoŭcy. 

Tyja, chto zmoh kampiensavać «škodu», z panižeńniem byli adpuščanyja na pracoŭnyja miescy. 

• 2
• 0
• 1
• 6
• 2
• 1
• 9
• 0