«Kabajeva nie paciahnuła, na žal». Rasijskija šavinisty rychtujucca źniščyć tych, chto ich sparadziŭ
«23 hady na čale krainy stajała nikčemnaść, jakaja zdoleła puścić pył u vočy značnaj častki nasielnictva», — piša pra Pucina pałkoŭnik FSB u adstaŭcy Ihar Hirkin (Strałkoŭ). Inšyja śpikiery šavinistyčnaha kryła vybirajuć jašče mienš łaskavyja słovy.
Padryŭ Krymskaha mosta vyklikaŭ siarod rasijskich błohieraŭ čarhovy vybuch biaśsilnaj złoby. «Rybar» zaklikaje da žorstkaj reakcyi, a asobnyja błohiery pierajšli da krytyki asabista Pucina, jaki raniej ličyŭsia niedatykalnym «carom-baciuchnam».
Rej viadzie pałkoŭnik FSB u adstaŭcy, były «ministr abarony» samaabvieščanaj «DNR», a ciapier błohier i aktyŭny krytyk Kramla z ultrapatryjatyčnych pazicyj Ihar Hirkin (Strałkoŭ). Jaho błohi stali papularnymi ŭ Rasii paśla taho, jak jon pieršy staŭ davać praŭdzivuju i nieprycharošanuju infarmacyju z frantoŭ i krytykavać rasijskaje kamandavańnie i ŭłady. Prahnozy Hirkina nie raz spaŭnialisia. Ën pieršy ŭ Rasii sprahnazavaŭ pravał nastupu na Danbasie i adstupleńnie rasijan z-pad Chiersona. Pry hetym Strałkoŭ (Hirkin) zastajecca na pazicyjach rasijskaha šavinizmu i impieryjalizmu.
Strałkoŭ krytykuje Pucina za nierašučaść i samaŭchileńnie ad niepryjemnych zadač.
«Šmat bałbatni, minimum spraŭ i absalutnaja biezadkaznaść za pravały — voś styl «poźniaha Pucina» (hoda tak z 14-ha). A jašče — ašalełaja vychvalnaja chłuśnia. Ale i jaje z pačatku SVA ŭžo nie pačuć…» — aburajecca były pałkoŭnik FSB.
Praciahvajučy svaje razvahi, Strałkoŭ jadavita zaŭvažaje:
«Vymušany škadavać, što Pucin — nie žančyna. U słabaj charaktaram i nie nadta razumnaj žančyny mahli b być talenavityja favaryty… Heta jak pašancuje, nasamreč (časta byvała i zusim naadvarot), ale byŭ by chacia b šaniec. A Kabajeva nie paciahnuła, na žal…»
U inšym dopisie były pałkoŭnik FSB kaža, što «23 hady na čale krainy znachodziłasia nikčemnaść, jakaja zdoleła puścić pył u vočy značnaj častcy nasielnictva. Ciapier jana — apošni vostraŭ lehitymnaści i ŭstojlivaści dziaržavy. Skałupnuć jaje niezakonnym šlacham — aznačaje «paśpiachova zaviaršyć» spravu tych, chto pasadziŭ Unikalnuju Pieravahu na prastoł u svoj čas.
Ale jašče šeść hadoŭ va ŭładzie hetaj bajaźlivaj niazdary kraina nie vytrymaje. I adzinaje, što jon moh by zrabić «pad zasłonu» karysnaha, — namiakaje Hirkin, — heta zabiaśpiečyć pieradaču ŭłady kamuści pa-sapraŭdnamu dziejazdolnamu i adkaznamu».
Radykalizavałasia i rytoryka inšaha błohiera. «Trynaccaty» vyłučajecca siarod vajenkaraŭ tym, što realna vajuje — z 2014 hoda. Hetuju vajnu jon prajšoŭ ad pieršaha dnia, ad pačatku zajmaŭ radykalnyja pazicyi, zaklikaŭ zabivać ukrainskich pałonnych, a z vosieni 2022 hoda, paśla adstupleńnia rasijskich vojskaŭ z-pad Chiersona, u jaho pastach narastajuć isteryčnyja notki.
«Trynaccaty» ŭ svaim hnievie na kiraŭnictva Rasii nie vybiraje litaraturnych vyrazaŭ.
Na jaho pohlad,
«hetyja «charošyja ludzi» praciahvajuć «zbožžavuju ździełku», umovy vykonvajucca «našym bokam». Jon zaklikaje: «Nie viercie nikomu, nam zdradzili, vorahi siadziać u Kramli».
Błohier upeŭnieny, što ŭ svaich pohladach jon nie adziny, i strašyć rašučymi dziejańniami:
«Ziapu vy mnie nie zakryjecie, nas sotni tysiač, vy albo bł***i prymajecie našy ŭmovy, albo narod vas tupa zžare, vas i vašych ja****ch dziaciej. Sardečna zaprašajem u realnaść!»
«Trynaccaty» vinavacić va ŭsich vajennych paražeńniach kiraŭnictva ŭ Maskvie: «Hienierał Suravikin pad aryštam, skažu prostymi słovami, što hetyja pi**ry adzinarosy pra**li Chierson, a ŭsio śpichnuli na jaho, a ciapier nachabna chłusiać, pi****ć, hledziačy nam u vočy! U ich u bolšaści dvajnoje, a to i trajnoje hramadzianstva! Niekali supracoŭnik KDB zdradziŭ prysiazie Savieckamu Sajuzu, a Jelcyn i jahonaja jab***ia kamanda nas źniščajuć. Čaho my čakajem?»
Błohier nakidvajecca na dziaržaŭnyja telekanały:
«Pieršy kanał, «Rasija 24» i inšaja ch***ia — heta absalutnaja infarmacyjnaja pamyjnica. Chto heta hladzić, vinšuju! Vy daŭb**b! Chto tam pracuje, taksama vinšuju! Vy zdradnik Radzimy, i nieŭzabavie vy za heta adkažacie».
Jak vidać, hradus niezadavolenaści rasijskich błohieraŭ raście. Akramia krytyki asabista Pucina, čuvać i zakliki da fizičnaj raspravy z vysokapastaŭlenymi zdradnikami radzimy.
Sami šavinisty pradčuvajuć, što miaža, za jakoj niepaźbiežnaja abo reakcyja pucinskaha isteblišmientu, abo novy miaciež, blizkaja.
«Ch**i jano tryccać hadoŭ siadzić tam, da kresła ŭžo pryrasło! Dy nie budu ja maŭčać, u mianie jość poŭnaje maralnaje prava havaryć!»
Taki post z atakaj asabista na Pucina «Trynaccaty» siońnia spačatku apublikavaŭ, ale praz 57 chvilin vydaliŭ.
Čytajcie jašče:
Hirkin prahnazuje razhrom rasijskich hrupirovak u Siryi i Armienii tureckimi vojskami
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku32
Kamientary