Rasijski hienierał Suravikin zatrymany kontrraźviedkaj — «Viorstka»
Namieśnik kamandujučaha abjadnanaj hrupoŭkaj rasijskich vojskaŭ va Ukrainie, hałoŭnakamandujučy Vajenna-kaśmičnych sił hienierał Siarhiej Suravikin zatrymany FSB pa padazreńni ŭ dačynieńni da arhanizacyi buntu, ale pa fakcie jamu pakul nie vystavili nijakich abvinavačvańniaŭ. Pra heta piša rasijskaje vydańnie «Viorstka» na padstavie śviedčańnia krynicy, blizkaj da pravaachoŭnych orhanaŭ.
Pa słovach jašče adnaho daśviedčanaha surazmoŭcy «Viorstki», Suravikin izalavany i nie vychodzić na suviaź ź blizkimi bolš za dva tydni.
Raniej FSB u pres-relizie zajaviła pra spynieńnie spravy ab vajskovym miaciažy suprać Jaŭhiena Pryhožyna i «vahnieraŭcaŭ». Adnak, jak patłumačyŭ «Viorstcy» advakat Jaŭhien Śmirnoŭ, hetaja infarmacyja moža nie adpaviadać rečaisnaści. «Sprava moža być raspačataja (ab zaviadzieńni i spynieńni spravy navat byli zajavy), ale pravieryć heta nierealna», — skazaŭ jon.
Choć pa bolšaści spraŭ termin zatrymańnia biez vybaru miery strymańnia — 48 hadzin, pa słovach Śmirnova, Suravikin całkam moža być izalavany da hetaha času.
«Sposabaŭ trymać čałavieka ŭ izalacyi ad hramadstva biez vystaŭleńnia abvinavačvańnia mnostva: administracyjny aryšt, zaviadzieńnie inšaj spravy (prykład — karupcyja) ci prosta bieź jurydyčnaha abhruntavańnia (umoŭny «padvał»), — udakładniŭ advakat. — Adnak Suravikin — dosyć vysokapastaŭlenaja fihura, da takich zvyčajna asablivaje staŭleńnie. Takim možna na słovach zabaranić vychodzić z domu i kamunikavać».
Adnosna losu Suravikina supiarečlivaja infarmacyja raspaŭsiudžvajecca z kanca červienia. 28 červienia vydańnie The Moscow Times sa spasyłkaju na dźvie svaje krynicy, blizkija da aparatu Minabarony, paviedamiła, što namieśnik kamandujučaha Abjadnanaj hrupoŭkaj rasijskich vojskaŭ va Ukrainie hienierał Siarhiej Suravikin aryštavany. Paśla taho roznyja krynicy to paćviardžali heta, to abviarhali. Ale na ludziach hienierał z taho času tak i nie źjaŭlaŭsia.
Aficyjnych kamientaroŭ nakont losu Suravikina doŭhi čas nie było. Tolki siońnia staršynia Kamiteta abarony rasijskaj Dziarždumy Andrej Kartapołaŭ zajaviŭ, što hienierał ciapier, maŭlaŭ, adpačyvaje. Adnak nie ŭdakładniŭšy, dzie kankretna.
Siarhieja Suravikina pryznačyli kamandujučym rasijskimi vojskami va Ukrainie ŭ kastryčniku 2022 hoda. U studzieni 2023 jaho źniali. Kamandujučym tak zvanaj Abjadnanaj hrupoŭkaj vojskaŭ byŭ pryznačany načalnik Hienštaba hienierał armii Valeryj Hierasimaŭ. Suravikin staŭ namieśnikam Hierasimava.
Padčas miaciažu Pryhožyna Suravikin vystupiŭ ź videapaviedamleńniem, u jakim zaklikaŭ «vahnieraŭcaŭ» spynicca.
Ciapier čytajuć
Muž hałoŭnaj hieraini prapahandysckaha filma BT skončyŭ žyćcio samahubstvam6
Kamientary