Novaje vyprabavańnie preparatu zalifładacyn (zoliflodacin) pakazała, što jon moža efiektyŭna lačyć bakteryjalnuju infiekcyju, jakaja na siońniašni dzień stała ŭstojlivaj amal da ŭsich dastupnych lekaŭ.
Hanareja, vyklikanaja bakteryjaj Neisseria gonorrhoeae, adna z najbolš raspaŭsiudžanych infiekcyj, što pieradajucca pałavym šlacham (IPPŠ) va ŭsim śviecie.
Simptomy mohuć być vielmi tryvožnymi i ŭklučajuć vyłučeńni žaŭtavataha koleru z pałavych orhanaŭ, kryvaciok pry mačavypuskańni, apuchłyja jaječki ŭ mužčyn i kryvaciok pamiž mienstruacyjami ŭ žančyn. Kali zachvorvańnie nie lačyć, jano moža vyklikać biaspłodździe, pavialičyć ryzyku zaražeńnia inšymi IPPŠ i navat pryvieści da takich uskładnieńniaŭ, jak ślepata ŭ novanarodžanych, jakija zarazilisia ad maci.
Chvaroba kaliści lohka paddavałasia lačeńniu pienicylinam. Ale za apošnija dziesiacihodździ hanareja papracavała nad saboju i stała ŭstojlivaja da amal usich antybijotykaŭ, jakija vykarystoŭvali suprać jaje minułyja pakaleńni.
Niadaŭna daktary pačali sutykacca z vypadkami hanarei, jakija vyjaŭlajuć ustojlivaść navat da najnoŭšych lekaŭ. Isnuje i šmat inšych mikrobaŭ, ustojlivych da siońniašnich preparataŭ, ale hanareja sapraŭdy moža stać adnoj ź pieršych supierbakteryj, jakija šyroka raspaŭsiudziacca siarod hramadstva ŭ nie vielmi addalenaj budučyni.
Praciahły kryzis antybijotykaŭ, vyklikany ŭstojlivaściu bakteryj, prymusiŭ mnohich navukoŭcaŭ i daśledčyja arhanizacyi šukać novyja srodki lekavańnia. U ideale novyja preparaty majuć nie tolki pracavać pa pryznačeńni, ale zmahacca ź infiekcyjami pryncypova novym sposabam u adroźnieńnie ad isnujučych antybijotykaŭ, padaŭžajučy tym samym čas, nieabchodny bakteryjam dla vypracoŭki ŭstojlivaści. I zdajecca, što preparat zalifładacyn adpaviadaje abodvum hetym kryteram.
Preparat raspracoŭvajecca niekamiercyjnaj arhanizacyjaj Global Antibiotic Research & Development Partnership (GARDP) u supracoŭnictvie z Entasis Therapeutics, filijałam farmaceŭtyčnaj kampanii Innoviva. U pačatku listapada GARDP abviaściła ab vynikach apošniaha i najbujniejšaha daśledavańnia zalifładacynu — III fazy kliničnaha vyprabavańnia.
U vyprabavańni ŭziali ŭdzieł bolš za 900 čałaviek u piaci krainach z dyjahnastavanaj niaŭskładnienaj hanarejaj abo infiekcyjaj bieź inšych faktaraŭ ryzyki, takich, jak ciažarnaść. Hetyja pacyjenty byli vypadkovym čynam raźmierkavany na pryjom adnarazovaj pieraralnaj dozy zalifładacynu abo kambinacyi dvuch inšych antybijotykaŭ (ceftryaksonu i azitramicynu, jakija vykarystoŭvajucca dla zvyčajnaha lačeńnia hanarei). Darečy, jak paviedamlaje Gizmodo, niekatoryja krainy (naprykład, ZŠA) pačali rekamiendavać tolki ceftryakson u jakaści lačeńnia hanarei, bo rezistentnaść da azitramicynu vyrasła).
Vyprabavańnie dasiahnuła svajoj asnoŭnaj mety: zalifładacyn, zdajecca, zabivaŭ infiekcyju hetak ža dobra, jak ceftryakson i azitramicyn. Preparat taksama dobra pieranosiŭsia, i nie było zarehistravana nijakich surjoznych pabočnych efiektaŭ abo śmierciaŭ, źviazanych ź jaho vykarystańniem. Inšyja daśledavańni pakazali, što zalifładacyn vykarystoŭvaje novy miechanizm dla źniščeńnia bakteryj hanarei i što jon moža supraćstajać ustojlivym da lekaŭ štamam. Takim čynam, vyniki atrymalisia navat lepšymi, čym moža zdacca na pieršy pohlad.
Vysnovy pavinny być jašče pravieranyja navukoŭcami ź inšych instytutaŭ i rehulujučymi orhanami. Kali pravierka projdzie paśpiachova, zalifładacyn vyjdzie na šlach da zaćviardžeńnia. Takim čynam, jon moža stać pieršym novym lekam ad hanarei, paśpiachova raspracavanym za apošnija dziesiacihodździ. Taksama srodak vyvučajecca ŭ jakaści lačeńnia inšych IPPŠ, takich jak chłamidyjoz.
GARDP tym časam užo atrymała pravy na kamiercyjalizacyju preparatu ŭ troch čverciach krain śvietu, uklučajučy bolšaść krain ź nizkim i siarednim uzroŭniem dachodu. Entasis budzie vałodać pravami na asnoŭnych rynkach astatnich krain, uklučajučy ZŠA. U ideale heta budzie aznačać, što zalifładacyn budzie adnosna dastupnym u tych miescach, dzie heta najbolš nieabchodna. Inšym važnym faktaram budzie nieabchodnaść dazavać preparat i vykarystoŭvać jaho tolki tady, kali inšyja mietady lačeńnia nie pracujuć, kab ustojlivaść da jaho zastavałasia nizkaj jak maha daŭžej.
Paźbiehnuć zaražeńnia infiekcyjami, jakija pieradajucca pałavym šlacham, dapamahaje daŭno viadomy antybijotyk
Ci sapraŭdy paśla seksu treba pamačycca? Daktary nie peŭnyja
«Jon zdradziŭ i prynios mnie infiekcyju, jakaja nie lečycca. Ciapier da kanca žyćcia pić tabletki!» Biełarusy raskazali, jak pieražyli zdradu ŭ adnosinach i jak zdradžvali sami
Kamientary