Homielskich školnikaŭ prymusiać šukać hieraičnaje minułaje ŭ Afhanskaj vajnie. Ciapier ideołahi nazvali jaje «śpiecapieracyjaj»
Uśled za temami pra Druhuju suśvietnuju vajnu i «hienacyd biełaruskaha naroda» navučencaŭ Homielskaj vobłaści abaviazali šukać «hieraizm» u savieckaj interviencyi ŭ Afhanistan. Hałoŭnaje ŭpraŭleńnie adukacyi Homielskaha abłvykankama vydała zahad ab praviadzieńni konkursu, pryśviečanaha vieteranam bajavych dziejańniaŭ u Afhanistanie i inšych «haračych kropkach». U rajonnych adździełach adukacyi padrychtavali dakumientacyju ab praviadzieńni konkursu — jana apynułasia ŭ rasparadžeńni «Fłahštoka».
Trahičnuju historyju niaŭdałaj vajny vyrašyli vykarystoŭvać u ideałahičnych metach. U dakumientach śćviardžajecca, što konkurs pravodzicca «ŭ metach vychavańnia ŭ padrastajučaha pakaleńnia pačućcia hramadzianskaści i patryjatyzmu, udaskanaleńnia raboty pa ideałahičnym vychavańni navučencaŭ», a taksama «papularyzacyi hieraičnaha minułaha našaj Radzimy na prykładach mužnaści i advahi žycharoŭ Homielskaj vobłaści, jakija ŭdzielničali ŭ łakalnych vojnach i vajennych kanfliktach».
Navučencaŭ płanujuć abaviazać «papularyzavać hieraičnaje minułaje Radzimy». Charakterna, što ŭ dakumientacyi vajna ŭ Afhanistanie nazyvajecca nie vajnoj, a «śpiecapieracyjaj» — pa anałohii ź ciapierašniaj rasijskaj vajennaj ahresijaj suprać Ukrainy. U adpaviednaści z umovami konkursu, nie prymajucca videaroliki, «jakija abražajuć dobryja jakaści i pačućci inšych ludziej».
Konkurs praduhledžvaje stvareńnie videarolikaŭ. Pieramožcaŭ i pryzioraŭ uznaharodziać dypłomami i suvienirami, a ŭdzielnikaŭ vynikovaha etapu — statuetkami. Raschody pa nabyćci suvieniraŭ i statuetak ažyćciaŭlajucca za košt srodkaŭ abłasnoha biudžetu, a kamandzirovačnyja raschody ŭdzielnikaŭ i supravadžajučych pavinny pakryvać miascovyja adździeły adukacyi.
Jašče pry isnavańni SSSR interviencyja ŭ hetuju krainu była nazvanaja trahičnaj pamyłkaj, jakaja pryviała da katastrafičnych nastupstvaŭ u samim Afhanistanie i hora ŭ dziasiatkach tysiač savieckich siemjaŭ.
Tolki pa aficyjnych danych, u hetaj vajnie zahinuli bolš za 15 tysiač savieckich vajskoŭcaŭ, zvyš 53 tysiač viarnulisia dadomu paranienymi i kantužanymi, bolš za 10 tysiač — invalidami.
Kamientary