Salej, Cypłakoŭ, Kalcoŭ — losy biełaruskich chakieistaŭ, jakija pieršymi skarali NCHŁ, vydalisia trahičnymi
Try biełaruskija chakieisty, što vystupali ŭ NCHŁ, zahinuli.
Eks-chakieist Kanstancin Kalcoŭ zahinuŭ u ZŠA. Jamu było 42 hady. Abstaviny trahiedyi pakul vyśviatlajucca.
Kalcoŭ byŭ u liku tych pieršych biełarusaŭ, jakija zrabili sabie karjeru ŭ amierykanskaj Nacyjanalnaj chakiejnaj lizie — najmacniejšym chakiejnym čempijanacie śvietu. Trapić tudy — užo dasiahnieńnie dla spartsmiena, ale zahulać jašče składaniej.
Kalcoŭ adhulaŭ u NCHŁ try siezony. Ahułam na jaho rachunku 144 hulni i 38 nabranych bałaŭ (12 zakinutych šajbaŭ i 26 halavych pieradač).
Da Kalcova imia ŭ NCHŁ sabie zrabili Rusłan Salej i Uładzimir Cypłakoŭ. Supadzieńnie, ale žyćcio kožnaha ź ich abarvałasia zaŭčasna.
36-hadovy Rusłan Salej zahinuŭ u avijakatastrofie 7 vieraśnia 2011 hoda.
Jon tolki-tolki pierajšoŭ u jarasłaŭski «Łakamatyŭ» paśla praciahłaj karjery ŭ Amierycy i vylataŭ na pieršy matč siezona ŭ Minsk. Pryčynaj katastrofy stała pamyłka ekipaža. Niechta ź piłotaŭ padčas raźbiehu samalota pa ŭźlotnaj pałasie nacisnuŭ na tarmazy.
Statystyka Saleja ŭ rehularnych siezonach NCHŁ — 917 hulniaŭ i 204 bały (45+159). Aproč taho, u kubku Stenli jon pravioŭ 62 hulni i nabraŭ 16 bałaŭ (7+9).
50-hadovy Uładzimir Cypłakoŭ pajšoŭ z žyćcia 14 śniežnia 2019 hoda. Blizkija siamji kazali, što heta byŭ suicyd
Cypłakoŭ adhulaŭ u rehularnych siezonach NCHŁ 331 matč i nabraŭ 170 bałaŭ (69+101). U kubku Stenli ŭ jaho 18 hulniaŭ i 3 bały (1+2).
Raniej za ich u NCHŁ vystupali Alaksandr Andryjeŭski (1 matč) i Aleh Mikulčyk (37 matčaŭ), ale jany tak i nie zahulali ŭ asnovie svaich kłubaŭ.
Usiaho ŭ NCHŁ hulali i hulajuć 15 biełaruskich chakieistaŭ (navat kali praviali matč-dva).
Zaraz tam vystupajuć Jahor Šaranhovič ('Kałhary») i Alaksiej Protas («Vašynhton»).
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary