U Polščy patłumačyli, čamu rasijskaha špijona Rubcova nie abmianiali na Pačobuta
Imia žurnalista zhadvałasia na pieramovach ab abmienie źniavolenymi pamiž Rasijaj i zachodnimi krainami, ale jon nie trapiŭ u abmien. Kiraŭnik Biuro nacyjanalnaj biaśpieki Polščy Jacak Sieviera patłumačyŭ čamu, piša Reform.news.
U vyniku abmienu, jaki prajšoŭ u Ankary 1 žniŭnia, Polšča pieradała Rasii abvinavačanaha ŭ špijanažy Paŭła Rubcova, aficera HRU, jaki dziejničaŭ pad imiem Pabła Hansalesa.
Pa słovach Sieviery, pa pytańni vyzvaleńnia Rubcova Polšča viała pieramovy tolki z ZŠA, a nie z Rasijaj i Biełaruśsiu.
«Majučy ŭ jakaści sajuźnika amierykancaŭ, nam daviałosia stavić umovy i reahavać na ich zapyty. Nakolki mnie viadoma, padčas pieramovaŭ uspłyvała imia Andžeja Pačobuta. Chod pieramovaŭ takoha typu zaŭsiody sutykajecca z roznymi ciažkaściami, pra jakija ja nie mahu tut zhadać», — skazaŭ Sieviera ŭ efiry TVP Info.
Pa słovach Sieviery, praca pa vyzvaleńni Pačobuta praciahvajecca.
Jon taksama adznačyŭ, što abmien Rubcova ŭ toj formie, u jakoj jon byŭ ažyćcioŭleny, moža prynieści Polščy bolš vyhady, čym jaho znachodžańnie pad vartaj i potym u turmie.
«Pa linii słužbaŭ — a hetyja pieramovy pravodzilisia šmat miesiacaŭ pierš za ŭsio śpiecsłužbami — takaja pasłuha źjaŭlajecca najbolš kaštoŭnaj valutaj. Abmienam hetaj valuty Polšča šmat razoŭ karystałasia, siarod inšaha dla atrymańnia infarmacyi ab špijonskich sietkach, jakija da hetaha času pryvodzili da napadaŭ, padpałaŭ abo dyviersij na terytoryi Polščy», — zajaviŭ Sieviera.
Kiraŭnik BNB paraŭnaŭ dziejnaść pa vyzvaleńni Pačobuta ź ihroj na niekalkich fartepijana i zajaviŭ, što takaja praca pravodzicca.
«Ihra ź Biełaruśsiu pa spravie vyzvaleńnia apazicyjaniera, jaki niepachisna pradstaŭlaje pazicyju jak biełarusa, tak i palaka, jaki krytyčna adnosicca da aŭtarytarnaj ułady, pavinna być ihroj, jakuju hrajuć, jak časam kažuć, na niekalkich fartepijana. Ihroj, jakaja praduhledžvaje prymianieńnie ekanamičnaha, palityčnaha cisku, a taksama cisku z boku trecich krain. Takaja ihra siońnia pravodzicca», — zajaviŭ Sieviera.
Nahadajem, u lutym 2023 hoda Pačobuta prysudzili da 8 hadoŭ kałonii ŭzmocnienaha režymu. Praces prachodziŭ u zakrytym režymie. Žurnalista pryznali vinavatym u raspalvańni varožaści i zaklikach da sankcyj. MZS Polščy zajaviŭ dniami, što pieramovy pa vyzvaleńni Pačobuta viaducca naŭprost ź Biełaruśsiu.
Ci mohuć demakratyčnyja siły vyzvalić palitviaźniaŭ praz svaju dyskredytacyju? Heta iluzija
MZS Polščy: Pytańnie vyzvaleńnia Pačobuta my abmiarkoŭvajem napramuju ź Biełaruśsiu
Łatuška prakamientavaŭ prapanovu režymu vydać jaho ŭ abmien na Pačobuta
Łukašysty prapanoŭvali palakam u abmien na vyzvaleńnie Pačobuta vydać im Łatušku — były ministr
Śluńkin: Mahčyma, vyzvaleńnie biełaruskich palitźniavolenych abmiarkoŭvajecca na inšym treku
Ciapier čytajuć
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary