Izrailskaja raźviedka «Masad» viała apieracyju pa ŭkaranieńni zaminiravanych pejdžaraŭ i racyj radykalnaj livanskaj hrupoŭki «Chiezbała» z 2015 hoda. Pra heta piša The Washington Post sa spasyłkaj na krynicy ŭ ZŠA, Izraili i na Blizkim Uschodzie.
Surazmoŭcy vydańnia adznačyli, što pryłady ŭtrymlivali vielizarnyja batarei, schavanuju vybuchoŭku i sistemu dla prasłuchoŭvańnia čalcoŭ hrupoŭki. «Masad», sa słoŭ krynic, moh padarvać pryłady i raniej, ale vyrašyŭ raspracavać novyja — bolš kampaktnyja pryłady.
Racyi dazvalali raźviedcy Izraila na praciahu dzieviaci hadoŭ padsłuchoŭvać razmovy «Chiezbały». Mierkavałasia, što ich mohuć padarvać u vypadku kryzisu. Ale zatym źjaviłasia novaja mahčymaść i novy pradukt — maleńki pejdžar, abstalavany mahutnaj vybuchoŭkaj, piša vydańnie. Pa danych krynic haziety, ideja ŭźnikła ŭ 2022 hodzie.
Dla padryvu vyrašyli vykarystoŭvać tajvańskija pejdžary Apollo, čyj vytvorca nijak nie źviazany ź Izrailem. Pryłady, vytvorčaść jakich nibyta było pieradadziena treciamu baku, na samaj spravie źbirali ŭ Izraili pad kantrolem «Masada». A kampanii-vytvorcy Gold Apollo pra heta nie viedali.
Nievialikaja kolkaść vybuchoŭki schavali ŭ błoku dla akumulatara, jaje było niemahčyma vyjavić. Izrailskija krynicy ličać, što «Chiezbała» pravieryła pejdžary, razabraŭšy niekalki pryład, a taksama, mahčyma, pravieryła ich z dapamohaj renthiena.
Pradstaŭnikam hrupoŭki vyjavić vybuchoŭku nie ŭdałosia. Jany taksama nie vyjavili, što «Masad» maje addaleny dostup da pryład. U vyniku «Chiezbała» zakupiła kala piaci tysiač pejdžaraŭ. U lutym 2024 hoda ich pačali atrymlivać bajcy siaredniaha źviana.
Akramia taho, u «Masadzie» raspracavali śpiecyjalnuju dvuchetapnuju praceduru rasšyfroŭki, nieabchodnuju dla prahladu abaronienych paviedamleńniaŭ na zaminiravanym pejdžary. Kab pračytać paviedamleńnie, treba było nacisnuć dźvie knopki. Treba vykarystoŭvać dźvie ruki.
Pa słovach adnoj z krynic, u vyniku nastupnaha vybuchu karystalniki amal napeŭna atrymali b ranieńni abiedźviuch ruk. Akramia taho, pejdžar moh vybuchać ad elektronnaha sihnału, adpraŭlenaha ahientami «Masada» na pryładu.
Adnačasovyja vybuchi pryład suviazi, jakija členy «Chiezbały» vykarystoŭvali dla ŭnutranaj zašyfravanaj pieradačy paviedamleńniaŭ, adbylisia ŭ vieraśni.
Pa danych Ministerstva achovy zdaroŭja Livana, usiaho ŭ vyniku vybuchaŭ zahinuli jak minimum 37 čałaviek, u tym liku niekalki dziaciej, jašče kala troch tysiač čałaviek atrymali ranieńni, mnohija ź jakich byli vypadkovymi hramadzianskimi asobami, piša Radyjo Svaboda.
Kamientary
Rychtavać terarestyčnyja ataki zabojstva zusim ińšy dośvied čym vieści vyviedku ahenturnuju dziejnaść??
U Halivudzie razpaviadzi scenar napišy.