Astapienia: Adbyvajecca peŭnaja transfarmacyja režymu ŭ Biełarusi
Zasnavalnik Centra novych idej, sacyjołah i palitołah Ryhor Astapienia ŭ novym vypusku TOKu vykazaŭ mierkavańnie, što režym Łukašenki ŭžo pačynaje mianiacca.
«My zaraz bačym: adbyvajecca peŭnaja transfarmacyja režymu ŭ Biełarusi, adbyvajecca pierazahruzka režymu. Jon śviadoma niekalki miesiacaŭ (a heta pačałosia jašče raniej) niepublična źmianiajecca», — zaŭvažaje Astapienia.
Voś što jon ličyć prykmietami hetaha pracesu.
Pieršaje — źmieny ŭ kadravaj palitycy.
«My bačym novyja pryznačeńni, jakija adbyvajucca. Tam niama siłavikoŭ. To-bok usie hady z 2020-ha išło pavieličeńnie kolkaści siłavikoŭ unutry kirujučaj sistemy. Ich stanaviłasia bolš, i jany byli bolš zaŭvažnymi. Ciapier źmianiajucca frontmieny. Źjaŭlajecca Kruty, źjaŭlajecca Piatkievič, Ryžankoŭ pierajšoŭ na inšuju pasadu, Markaŭ i hetak dalej. Heta vyraznaja źmiena ŭnutry taho, kim jany sami siabie bačać. Što jany voś užo nie siłavyja».
«Ciapier idzie razmova pra toje, kab źbirać niejkich ludziej pad tranzit. To-bok paśla 2025 hoda, jak Alaksandr Łukašenka pasprabuje kamuści pradać hety svoj vobraz krychu bolš libieralny. (…) I, adpaviedna, dla hetaha patrebny takija ludzi, jak Natalla Piatkievič», —
zaŭvažaje palitołah i vykazvaje mierkavańnie, što Piatkievič zastaniecca i paśla praviadzieńnia prezidenckich vybaraŭ, bo «jana vielmi mocny kadr».
Druhoj prykmietaj žadańnia pierazahruzki Astapienia nazyvaje vyzvaleńnie palitviaźniaŭ: «Dosyć składany praces, ale ž jany heta rašeńnie dla siabie pryniali, i jaho treba padtrymać».
Adnak jon nie ličyć hety praces sihnałam Łukašenki ab hatoŭnaści da pieramovaŭ z Zachadam:
«Ja nie dumaju, što jany vielmi chočuć zaraz pieramovaŭ. Niama pamknieńnia, što voś tut i ciapier my chočam pieramovaŭ. Jość pamknieńni, što nam treba stvaryć umovy, u jakich my zmožam kaliści razmaŭlać z Zachadam, kali jany pačnuć dumać, što my krychu samastojnaja dziaržava. (…)
Alaksandru Łukašenku treba im [krainam Zachadu] viarnuć pačućcio, što jon važny, što jon tut hulec. I heta važna nie tolki dla jaho. Jon taksama razumieje, što vajna ŭ lubym vypadku budzie zakančvacca. (…) Jon chacieŭ by być častkaj pieramoŭnaha pracesu. Jon nie choča apynucca ŭ toj situacyi, što Pucin budzie z kimści damaŭlacca, a paśla budzie zvanić u Minsk i kazać: «Nu voś my pryniali takoje rašeńnie pra Biełaruś». Jamu nie chočacca być u takoj situacyi».
Astapienia razvažaje, što budučuju prezidenckuju kampaniju Łukašenka choča vykarystać dla pierazahruzki.
«I dla častki kirujučaj elity taksama jość pačućcio, što treba pierabudoŭvacca», — ličyć analityk. Ale heta nie aznačaje, što ŭnutry sistemy jość niechta prazachodniaj aryjentacyi.
«Prablema dla ich — Biełaruś nie moža žyć narmalna biez budovy narmalnych stasunkaŭ z Zachadam. Heta prosta hieahrafična tak vypała, što ŭ lubym vypadku treba niejak damaŭlacca. U lubym vypadku treba raźvivać niejki handal, łahistyku i hetak dalej. Hetaha im nie paźbiehnuć. I tamu kožny ź ich u niejkaj stupieni razumieje: «Nu tak, nam treba štości prydumać», — tłumačyć analityk.
Astapienia ličyć, što mnohija ŭnutry sistemy aścierahajucca, što Kreml moža pašyryć svoj upłyŭ na kadravuju palityku ŭ biełaruskich strukturach ułady.
«Dumaju, što hety faktar jość. Pačućcio, što «my nie pavinny siabie zahnać u takuju situacyju, kali nam tut buduć vykručvać ruki». I ŭ taki momant umoŭny Maksim Ryžankoŭ razumieje, što nam treba tady raźvić stasunki z Kitajem i adbudavać stasunki z Zachadam. A kab raźvić stasunki z Kitajem, znoŭ ža, treba damovicca z Zachadam. Bo Kitaj zacikaŭleny ŭ Biełarusi, kali łahistyčna Biełaruś źjaŭlajecca niejkim centram Jeŭropy».
Hladzicie całkam:
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud31
Kamientary
Biełaruś nie možiet, a oni očień dažie mohut! I nikohda raźvitije strany dla nich nie było i nie budiet problemoj!