Alaksiej Kołasaŭ trapiŭ u startavy skład «Fiładelfii» na matč z «Manrealem».
Dla biełaruskaha bramnika heta budzie debiut u rehularnym čempijanacie NCHŁ. Matč adbudziecca ŭ Fiładelfii i pačniecca ŭ 2:00 pa biełaruskim časie.
Kołasavu 22 hady, jon vychavaniec škoły minskaha «Dynama». U 2021 hodzie «Fiładelfija» vybrała jaho na drafcie ŭ 3-m raundzie pad ahulnym 78-m numaram. U lipieni 2023 hoda Kołasaŭ padpisaŭ trochhadovy kantrakt z kłubam NCHŁ, ale jaho na hod pakinuli ŭ minskim «Dynama», dzie jon byŭ asnoŭnym bramnikam. Viasnoj, kali siezon u Kantynientalnaj chakiejnaj lizie zaviaršyŭsia, Alaksiej navat pajechaŭ u Paŭnočnuju Amieryku i paśpieŭ zhulać za farm-kłub u druhoj pa mocy lizie ACHŁ.
Uletku bramnik viarnuŭsia na radzimu, a pierad pačatkam novaha siezonu stvaryŭ cełuju epapieju vakoł svajho viartańnia ci nieviartańnia ŭ ZŠA. ŚMI paviedamlali, što biełarus byŭ nieščaślivy ŭ Fiładelfii, nie zdoleŭ ulicca ŭ kamandu, tamu chacieŭ zastacca ŭ zvykłym dla jaho «Dynama». Kołasaŭ nibyta praspaŭ rejs u Fiładelfiju, a paśla navat źmianiŭ ahienta, kab toj dapamoh jamu vyrašyć pytańnie z kantraktam u NCHŁ.
Adnak, paśla miesiacaŭ čutak i kamientaryjaŭ, Kołasaŭ usio ž pajechaŭ u ZŠA, uziaŭ udzieł u trenirovačnym łahiery i pačaŭ hulać za farm-kłub «Fiładelfii». Paŭnočnaamierykanskija insajdary kažuć, što biełarus pryjechaŭ z adnoj umovaj: kali ŭ jaho nie ŭdasca zamacavacca ŭ NCHŁ, kłub adpuścić jaho na radzimu ŭ arendu. Statystyka Alaksieja ŭ ACHŁ nie vielmi ŭražvaje — jon adbivaje tolki 87,5% kidkoŭ. Adnak Kołasavu dapamahła katastrofa ŭ asnoŭnaj kamandzie.
«Fiładelfija» na starcie siezona paciarpieła šeść paraz u vaśmi matčach i ŭpeŭniena zamykaje tablicu Uschodniaj kanfierencyi. Nie apošniuju rolu ŭ hetym pravale syhraŭ rasijski bramnik Ivan Fiadotaŭ — jon u troch matčach prapuściŭ lohkija šajby i vyklikaŭ niezadavolenaść trenieraŭ i zaŭziataraŭ. Asnoŭny bramnik «Lotčykaŭ» švied Samuel Ersan taksama pakul nie ŭzor nadziejnaści. Usio heta adkryła darohu da debiutu dla biełarusa.
Kołasaŭ stanie pieršym biełaruskim bramnikam u historyi, jaki praviadzie matč u najmacniejšaj lizie śvietu.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary