Imavierny premjer Litvy: Štučnyja abmiežavańni dla biełarusaŭ niełahičnyja. Biełarusy dapamahajuć ekanomicy Litvy
Kandydat na pasadu kiraŭnika litoŭskaha ŭradu Hintaŭtas Pałuckas ličyć, što biełarusy ŭ Litvie nie robiać ničoha drennaha, a naadvarot — dapamahajuć krainie raści, piša «Radyjo Svaboda».
Hintaŭtas Pałuckas źjaŭlajecca kandydatam na pasadu premjera ad Sacyjał-demakratyčnaj partyi, jakaja atrymała pieramohu na niadaŭnich parłamienckich vybarach.
Palityk adkazaŭ na pytańnie «Nastojaŝieho vriemieni», što jon dumaje ab prapanovach uzmacnić žorstkaść praviłaŭ znachodžańnia i naturalizacyi dla vychadcaŭ ź Biełarusi ŭ Litvie.
«Ja nahadaju, što biełarusaŭ my jak dziaržava zaprasili sami. Zaprasili, imknučysia stvaryć dla ich demakratyčnyja i biaśpiečnyja ŭmovy dla žyćcia, pracy i adkryćcia biźniesu, paśla taho, jak spadar Łukašenka čarhovy raz — u dvukośsiach — «pieramoh» na vybarach u Biełarusi. Kazać, što biełarusy, jakija pryjechali siudy, robiać niešta drennaje, u mianie asabista jazyk nie pavierniecca. Tym bolš što jany sapraŭdy robiać svoj uniosak u našu ekanomiku i źjaŭlajucca ŭdzielnikami rynku pracy».
Pavodle Pałuckasa, nichto ź biełarusaŭ nie staić na biržy pracy z praciahnutaj rukoj, prosiačy sacyjalnaj dapamohi. Biełarusy, na jaho dumku, dapamahajuć ekanomicy Litvy raści.
«Što da roznych vyklikaŭ u halinie biaśpieki, biez sumnievu, my razumiejem, što roznyja vyviednyja słužby dziejničajuć — tyja ci inšyja pracesy adbyvajucca pa ŭsim śviecie, u tym liku i ŭ Litvie. Nam treba analizavać, aceńvać i nazirać za peŭnymi rečami, jakija znachodziacca ŭ płoskaści nacyjanalnaj biaśpieki.
Adnak štučnyja abmiežavańni, nakštałt zabaronaŭ viartacca na radzimu ci bačycca sa svajakami, niaŭstojlivyja i nielahičnyja», — zajaviŭ Pałuckas.
Jon dadaŭ, što supracoŭniki biełaruskaj vyviedki, jakija žadajuć upłyvać na dyjasparu i tych biełarusaŭ, jakija pierajechali ŭ Litvu, mohuć rabić heta i prosta ŭ Litvie, a nie tolki na terytoryi Biełarusi.
«Zadača litoŭskaha Departamienta dziaržbiaśpieki palahaje ŭ tym, kab hetaha nie było. A štučnyja abmiežavańni nie pracujuć. My bačym prykład Polščy, dzie padobnych abmiežavańniaŭ niama, i, zychodziačy z hetaha, miarkujem, što takuju palityku mahli b pravodzić i ŭ Litvie», — zajaviŭ Hintaŭtas Pałuckas.
Hintaŭtas Pałuckas — vice-staršynia Sacyjał-demakratyčnaj partyi Litvy. Deputat Siejma. Naradziŭsia ŭ 1979 hodzie ŭ horadzie Paniaviežys. Pa śpiecyjalnaści — matematyk-infarmatyk. Taksama vyvučaŭ prava ŭ Vilenskim univiersitecie. Zajmaŭ pasadu kiraŭnika haradskoj administracyi Vilni (2007—2009) i vice-mera litoŭskaj stalicy (2015—2019).
Jurkonis pra biełarusaŭ u Litvie: Humanitarny DNŽ ciapier vydajuć chutčej. A pahrozaj nacbiaśpieki pryznali mienš za 3%
Litoŭski błohier naviedaŭ Minsk — i voś jaki rajon nazvaŭ najlepšym
Ministr unutranych spraŭ Litvy nazvała, kolki biełarusaŭ daviałosia prymusova vysłać nazad u krainu
Padličyli, kolki biełarusaŭ žyvie ŭ Polščy i Litvie
Kamientary
Kali biaz žartaŭ, dyk vielmi pryjemna zapeŭnicca, što ŭ Lijetuvie zdarovy sens nie hość i nie tranzytny pasažyr.