Ministr unutranych spraŭ Litvy nazvała, kolki biełarusaŭ daviałosia prymusova vysłać nazad u krainu
Za 2023 hod Departamient dziaržaŭnaj biaśpieki Litvy pryznaŭ 1421 hramadzianina Biełarusi pahrozaj nacyjanalnaj biaśpiecy. Ciaham 2024 hoda — 224 čałavieki. Jak vynikaje sa słoŭ ministra ŭnutranych spraŭ Litvy Ahne Biłatajcie, niekatorych z hetaha śpisu daviałosia prymusova vyvozić ź Litvy ŭ Biełaruś.
U jakich biełarusach Litva bačyć pahrozu?
Jak praviła, Departamient dziaržaŭnaj biaśpieki Litvy pryznaje pahrozaj tych biełarusaŭ, jakija raniej słužyli pa kantrakcie ŭ šerahach MUS Biełarusi, u vojsku abo inšych siłavych viedamstvach, zajmali vysokija pasady ŭ dziaržaŭnych strukturach abo źjaŭlajucca «kašalkami» režymu Łukašenki.
Ludzi, jakich Litva pryznaje pahrozaj nacyjanalnaj biaśpiecy, musiać pakinuć jaje terytoryju.
Kolki čałaviek admoviłasia źjechać dobraachvotna?
U repartažy kanała TV3 ministr unutranych spraŭ Litvy Ahne Biłatajcie paviedamiła žurnalistam, što na dadzieny momant jość 9 vypadkaŭ, kali Słužba achovy dziaržaŭnaj miažy prymusova vysłała takich biełarusaŭ ź Litvy.
Kiraŭnik adździeła mihracyi Aŭdrus Šantaras u tym ža efiry patłumačyŭ, što, pakolki čałaviek ujaŭlaje pahrozu hramadstvu, jaho dastaŭlajuć da dziaržaŭnaj miažy, dzie jon sam prachodzić pahraničny kantrol i pakidaje terytoryju Litvy, źjazdžajučy ŭ Biełaruś.
Pry hetym varta adznačyć, što vysyłcy ź Litvy nie padlahajuć tyja hramadzianie Biełarusi, jakija atrymali DNŽ na humanitarnych padstavach.
Jaskravy prykład — kiejs z aktyvistkaj Volhaj Karač. Choć jaje i pryznali pahrozaj nacyjanalnaj biaśpiecy, joj vydali novy DNŽ na humanitarnych padstavach i nie stali patrabavać ad jaje pakinuć krainu praz pahrozu palityčnaha pieraśledu ŭ Biełarusi.
Nahadajem, u Biełarusi Volzie Karač zavočna prysudzili 12 hadoŭ pazbaŭleńnia voli.
Kiraŭnik «Bajsoł» Andrej Stryžak u kamientary «Našaj Nivie» skazaŭ, što im nieviadomy vypadki, kali prymusova vysłanyja ź Litvy biełarusy paśla trapili pad kryminalny pieraśled na radzimie pa palityčnych matyvach.
Pa stanie na 1 lipienia 2024 hoda 62 535 biełarusaŭ majuć dziejny litoŭski dazvoł na žycharstva.
-
MARH zarubiŭ inicyjatyvu stvareńnia ŭ Minsku eśpierymientalnaj kramy biez ceńnikaŭ
-
Bolš za pałovu biełarusaŭ z novaha śpisu, jakija vajujuć za Rasiju, majuć sudzimaści
-
«Pavinien byŭ pisać, jak choča ekśpiert». Što pakazała dziaržaŭnaja psichalinhvistyčnaja ekśpiertyza artykułaŭ palitviaźnia Ihara Iljaša
Ciapier čytajuć
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ77
Kamientary