Tramp pazvaniŭ Pucinu? Jość infarmacyja, ale Maskva abviarhaje
Donald Tramp u čaćvier patelefanavaŭ Uładzimiru Pucinu i zaklikaŭ taho nie iści na eskałacyju va Ukrainie, a taksama nahadaŭ ab vajskovaj prysutnaści ZŠA ŭ Jeŭropie.
Pra heta raskazali krynicy haziety Washington Post.
Pa słovach niekalkich krynic, Pucin i Tramp abmierkavali metu ŭstanavić mir na jeŭrapiejskim kantyniencie, i Tramp vykazaŭ zacikaŭlenaść u nastupnych razmovach, kab abmierkavać «bolš chutkaje ŭrehulavańnie vajny va Ukrainie».
Padčas svajoj prezidenckaj kampanii Tramp zajaŭlaŭ, što nieadkładna pakładzie kaniec vajnie va Ukrainie, choć i biez padrabiaznaściej pra toje, jak jon maje namier heta zrabić. U pryvatnym paradku jon daŭ zrazumieć, što padtrymaŭ by ŭhodu, pry jakoj Rasija zachavała b častku zachoplenaj terytoryi, i padčas telefonnaj razmovy jon koratka zakranuŭ pytańnie ab ziamli, paviedamili krynicy.
Urad Ukrainy byŭ prainfarmavany ab telefanavańni Uładzimiru Pucinu i nie piarečyŭ suprać praviadzieńnia razmovy, paviedamili dva čałavieki, znajomyja ź situacyjaj. Ukrainskija aficyjnyja asoby daŭno razumieli, što Tramp budzie ŭzajemadziejničać z Pucinym u pošukach dypłamatyčnaha rašeńnia dla Ukrainy.
Adzin były amierykanski čynoŭnik, znajomy z telefonnaj razmovaj Pucina, skazaŭ, što Tramp, imavierna, nie choča ŭstupać na pasadu va ŭmovach novaha kryzisu va Ukrainie, vyklikanaha eskałacyjaj z boku Rasii, «što daje jamu stymuł nie dapuścić abvastreńnia vajny».
Tramp raniej zajaviŭ, što paśla pieramohi na vybarach paśpieŭ parazmaŭlać z 70 suśvietnymi lidarami, u tym liku z prezidentam Ukrainy Uładzimiram Zialenskim. Pry hetym Tramp razmaŭlaje z zamiežnymi kalehami biez padtrymki Dziarždepartamienta i ŭradavych pierakładčykaŭ. Tramp i jaho pamočniki nie daviarajuć čynoŭnikam paśla źlivaŭ ź pieramovaŭ padčas jaho pieršaha terminu. Tamu z suśvietnymi lidarami Tramp kantaktuje niepasredna.
UPD. 11 listapada pres-sakratar Uładzimira Pucina abvierh infarmacyju pra telefonnuju razmovu, nazvaŭ jaje «čystaj vydumkaj». Taksama i MZS Ukrainy abvierła infarmacyju, što Ukraina była painfarmavanaja pra razmovu. Takim čynam, zastajecca niajasnym, ci razmova mieła miesca.
-
U Hiermanii mužčyn pryzyŭnoha ŭzrostu abaviazali ŭzhadniać z Bundeśvieram praciahły vyjezd za miažu
-
Śpikier armianskaha parłamienta: Armienija moža vyjści z ADKB i JEAES, kali Maskva budzie iści na abvastreńnie
-
U Niepale hornyja pravadniki pravakavali «hornuju chvarobu» ŭ turystaŭ, kab na hetym uzbahačacca
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty45
Kamientary