Kiraŭnik rady Edynburha zasypaŭ ukrainskich biežanak intymnymi paviedamleńniami. Ciapier u jaho prablemy
Kemi Deja chočuć vyhnać i ź Lejbarysckaj partyi, i z rady stalicy Šatłandyi.
Kiraŭnik haradskoj rady Edynburha Kemi Dej trapiŭ u hučny skandał. Niekalki ŭkrainskich biežanak abvinavacili palityka ŭ tym, što jon zasypaŭ ich intymnymi paviedamleńniami i pieraśledavaŭ u internecie.
Dej naviedvaŭ praŭkrainskija akcyi ŭ horadzie, pryhladaŭsia tam da dziaŭčat, a zatym znachodziŭ ich u sacsietkach, piša The Herald.
Palityk aktyŭna reahavaŭ na fatahrafii dziaŭčat, pisaŭ im u pryvat adkrytyja paviedamleńni z smajlikami-pacałunkami i prapanoŭvaŭ «sustrecca za kielicham vina».
Adna z ukrainak, jakaja pierajechała ŭ Edynburh, ratujučysia ad vajny, raskazała, što była adkrytaja da novych znajomstvaŭ i spačatku ździviłasia, što taki vysokapastaŭleny čałaviek nadaje joj uvahu.
«Z samaha pačatku, kali ja pryjechała ŭ Šatłandyju, ja była adkrytaja da novych znajomstvaŭ, bo znachodziłasia adna ŭ čužoj krainie. Paśla pieražytaj vajny ja adčuvała siabie adzinokaj i čužoj u novaj krainie. Kali Kemi Dej upieršyniu napisaŭ mnie praź niekalki sacyjalnych sietak, ja była ździŭlenaja», — raskazała dziaŭčyna.
Paźniej jana pabačyła palityka na adnoj z ukrainskich akcyj.
«Jon znajšoŭ mianie i padpisaŭsia na maje sacsietki, aktyŭna staviŭ łajki maim historyjam, adpraŭlaŭ emodzi z pacałunkami, asabliva kali ja vykładała fota sa spartzały abo basiejna.
Adnojčy jon znajšoŭ mianie na sajcie znajomstvaŭ i napisaŭ mnie, što zdałosia mnie dziŭnym, bo jon užo sačyŭ za maimi sacsietkami i viedaŭ, što ja viedaju, chto jon», — dadała dziaŭčyna.
Biežanka raskazała, što adčuvała nieabchodnaść być «vietlivaj», ale starałasia paźbiahać seksualnych tem.
«Kožny raz, kali jon pisaŭ mnie ŭ prahramie dla znajomstvaŭ, ja adčuvała cisk, bajałasia admović jamu ci skazać niešta nie tak. Ja sprabavała ihnaravać usie jahonyja namioki na seks ci sustrečy, tamu što bajałasia jahonaha ŭpłyvu, i prosta starałasia być vietlivaj, kab paźbiehnuć kanfliktu», — padzialiłasia biežanka z Ukrainy.
Jana raskazała, što niekalki jaje siabrovak-ukrainak taksama sutykalisia z zacikaŭlenaściu Deja.
«Adna z maich ukrainskich siabrovak skazała, što hety čałaviek prajaŭlaŭ da jaje seksualnuju zacikaŭlenaść niejki čas, ale ja nie viedaju, što mienavita adbyłosia i čamu jon byŭ zacikaŭleny mienavita va ŭkrainkach», — adznačyŭ dziaŭčyna.
Padobnuju historyju raskazała jašče adna biežanka.
«Jon pačaŭ padpisvacca na mianie, potym adpraŭlaŭ šmat emodzi i reakcyj na maje publikacyi, a taksama prapanoŭvaŭ sustrecca. Heta było zanadta dakučliva, i ja nie viedała, jak skazać jamu, što nie chaču ź im mieć znosin, z-za jaho stanovišča», — adznačyła dziaŭčyna.
Jana dadała, što zmahła zabycca pra hetuju historyju tolki paśla pierajezdu ŭ inšuju krainu.
Palicyja ŭžo pačała rasśledavańnie pavodzin Kemi Deja. Ceły šerah palitykaŭ zaklikali jaho pajści ŭ adstaŭku z pasady kiraŭnika haradskoj rady, jakuju jon zajmaje z 2022 hoda. Lejbarysckaja partyja ŭ Šatłandyi ŭžo abviaściła, što prypyniaje siabroŭstva Deja da zakančeńnia rasśledavańnia.
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała29
Kamientary