Кіраўнік рады Эдынбурга засыпаў украінскіх бежанак інтымнымі паведамленнямі. Цяпер у яго праблемы
Кэмі Дэя хочуць выгнаць і з Лейбарысцкай партыі, і з рады сталіцы Шатландыі.
Кіраўнік гарадской рады Эдынбурга Кэмі Дэй трапіў у гучны скандал. Некалькі ўкраінскіх бежанак абвінавацілі палітыка ў тым, што ён засыпаў іх інтымнымі паведамленнямі і пераследаваў у інтэрнэце.
Дэй наведваў праўкраінскія акцыі ў горадзе, прыглядаўся там да дзяўчат, а затым знаходзіў іх у сацсетках, піша The Herald.
Палітык актыўна рэагаваў на фатаграфіі дзяўчат, пісаў ім у прыват адкрытыя паведамленні з смайлікамі-пацалункамі і прапаноўваў «сустрэцца за келіхам віна».
Адна з украінак, якая пераехала ў Эдынбург, ратуючыся ад вайны, расказала, што была адкрытая да новых знаёмстваў і спачатку здзівілася, што такі высокапастаўлены чалавек надае ёй увагу.
«З самага пачатку, калі я прыехала ў Шатландыю, я была адкрытая да новых знаёмстваў, бо знаходзілася адна ў чужой краіне. Пасля перажытай вайны я адчувала сябе адзінокай і чужой у новай краіне. Калі Кэмі Дэй упершыню напісаў мне праз некалькі сацыяльных сетак, я была здзіўленая», — расказала дзяўчына.
Пазней яна пабачыла палітыка на адной з украінскіх акцый.
«Ён знайшоў мяне і падпісаўся на мае сацсеткі, актыўна ставіў лайкі маім гісторыям, адпраўляў эмодзі з пацалункамі, асабліва калі я выкладала фота са спартзалы або басейна.
Аднойчы ён знайшоў мяне на сайце знаёмстваў і напісаў мне, што здалося мне дзіўным, бо ён ужо сачыў за маімі сацсеткамі і ведаў, што я ведаю, хто ён», — дадала дзяўчына.
Бежанка расказала, што адчувала неабходнасць быць «ветлівай», але старалася пазбягаць сэксуальных тэм.
«Кожны раз, калі ён пісаў мне ў праграме для знаёмстваў, я адчувала ціск, баялася адмовіць яму ці сказаць нешта не так. Я спрабавала ігнараваць усе ягоныя намёкі на сэкс ці сустрэчы, таму што баялася ягонага ўплыву, і проста старалася быць ветлівай, каб пазбегнуць канфлікту», — падзялілася бежанка з Украіны.
Яна расказала, што некалькі яе сябровак-украінак таксама сутыкаліся з зацікаўленасцю Дэя.
«Адна з маіх украінскіх сябровак сказала, што гэты чалавек праяўляў да яе сэксуальную зацікаўленасць нейкі час, але я не ведаю, што менавіта адбылося і чаму ён быў зацікаўлены менавіта ва ўкраінках», — адзначыў дзяўчына.
Падобную гісторыю расказала яшчэ адна бежанка.
«Ён пачаў падпісвацца на мяне, потым адпраўляў шмат эмодзі і рэакцый на мае публікацыі, а таксама прапаноўваў сустрэцца. Гэта было занадта дакучліва, і я не ведала, як сказаць яму, што не хачу з ім мець зносін, з-за яго становішча», — адзначыла дзяўчына.
Яна дадала, што змагла забыцца пра гэтую гісторыю толькі пасля пераезду ў іншую краіну.
Паліцыя ўжо пачала расследаванне паводзін Кэмі Дэя. Цэлы шэраг палітыкаў заклікалі яго пайсці ў адстаўку з пасады кіраўніка гарадской рады, якую ён займае з 2022 года. Лейбарысцкая партыя ў Шатландыі ўжо абвясціла, што прыпыняе сяброўства Дэя да заканчэння расследавання.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы12
Каментары