Pratasievič jeździŭ da Babaryki ŭ kałoniju niekalki razoŭ

Usiaho Pratasievič vykłaŭ try fatahrafii i adno videa. Jon paviedamiŭ, što Viktar Dźmitryjevič «vyhladaje badziorym» i «nie straciŭ svajho krasamoŭstva». Pa słovach Pratasieviča, Babaryka atrymaŭ viestački ad rodnych i zmoh napisać im listy.

Pa apublikavanych kadrach składana skazać, jak mienavita była ŭładkavanaja sustreča, ci byŭ na joj chtości jašče i pra što išła havorka.

Ale na videa mužčyny nie źjaŭlajucca razam: spačatku Pratasievič havoryć ustupnaje słova, a paśla karcinka źmianiajecca, i Babaryka pieradaje ciopłyja słovy svaim rodnym — dačce i maleńkaj unučcy, žadaje im družna sustreć «usie śviaty, jakija buduć».

Praŭda, sam Pratasievič u apublikavanych materyjałach vyhladaje krychu pa-roznamu. Na fota jon hładka paholeny, a na videa ŭ jaho na ščokach źjaviłasia prykmietnaje ščacińnie. Akramia taho, na fota ŭ jaho na skroniach adraśli vałasy, a na videa pryčoska krychu inšaja, a skroni vyhalenyja.

Pavialičyć

Vierahodna, hetyja adroźnieńni mohuć śviedčyć pra toje, što «ŭstup» ad Pratasieviča i astatnija kadry byli źniatyja ŭ roznyja dni, a pajezdak u Navapołack było jak minimum dźvie (albo što Pratasievič adhadavaŭ ščacińnie i pastryhsia ŭ pracesie).

U vychodnych danych videa ŭ jakaści daty stvareńnia paznačanaja ranica 8 studzienia (adnak heta nie abaviazkova aznačaje momant zdymki). A voś u vychodnych danych fota nijakaj infarmacyi niama.

Sam Pratasievič nie havoryć i nie piša, kali mienavita i kolki razoŭ bačyŭsia ź Viktaram Babarykam u kałonii. Taksama jon abychodzić uvahaj i mnostva inšych važnych pytańniaŭ. Naprykład, čamu mienavita jon trapiŭ na heta «spatkańnie», čamu paŭtara hoda da hetaha advakaty nie mahli źviazacca sa svaim padabaronnym, a rodnyja — z tatam i dziadulem. 

Viktar Babaryka, jaki ŭ mai 2020 hoda zajaviŭ pra namier bałatavacca, znachodzicca za kratami z 18 červienia 2020 hoda, kali byŭ aryštavany razam z synam Eduardam.

Praz hod, u lipieni 2021 hoda, jon byŭ asudžany na 14 hadoŭ.

Kamanda źvierchu zrabić režym utrymańnia maksimalna strohim pryjšła adnosna Babaryki prykładna ŭ lutym 2023 hoda. Da jaho pierastali puskać advakata.

25 krasavika 2023 hoda Viktara Babaryku z kałonii pavieźli ŭ špital. Pavodle infarmacyi, pieradadzienaj žurnalistam pracaŭnikami bolnicy, 27 krasavika palityk byŭ u chirurhičnym adździaleńni ŭ stanie siaredniaj ciažkaści. Paźniej pravaabaroncam stała viadoma, što Babaryku pieraviali ŭ turemny špital pry SIZA № 1 u Minsku. Paźniej Viktara Babaryku viarnuli ŭ kałoniju.

Pavodle śviedčańnia byłoha palitviaźnia, viasnu i leta 2023 hoda Babaryka pravioŭ u kałonii ŭ PKT, u poŭnaj izalacyi ad inšych viaźniaŭ. Śled Viktara Babaryki zhubiŭsia ŭ listapadzie 2023-ha, kali jaho bačyli ŭ kalidory PKT.

• 3
• 1
• 2
• 7
• 4
• 8
• 9
• 0