Mižnarodnaja kamanda daśledčykaŭ uznaviła abličča słavutaha aŭstryjskaha kampazitara Volfhanha Amadeja Mocarta pry dapamozie sudova-miedycynskaj rekanstrukcyi čerapa, jaki mierkavana naležyć kampazitaru. Vyniki apublikavanyja ŭ časopisie Anthropological Review.
Bolšaść viadomych nam partretaŭ Mocarta stvaralisia ŭžo paśla jaho śmierci, a vyjavy pry žyćci byli albo niedaskanałyja, albo ich sapraŭdnaść pastajanna asprečvałasia.
Brazilski śpiecyjalist pa sudovaj antrapałohii Cyceron Marajes vypadkova daviedaŭsia pra čerap, jaki zachoŭvaŭsia ŭ muziei Mocarteŭma ŭ Zalcburhu z 1902 hoda. Jon i jahonaja kamanda vykarystoŭvali mietady 3D-madelavańnia, danyja pra taŭščyniu miakkich tkanak jeŭrapiejcaŭ XVIII stahodździa i anatamičnuju defarmacyju virtualnaha «donara».
«Stan čerapa byŭ dobrym, choć adsutničali nižniaja skivica i niekalki zuboŭ. My zmahli adnavić ich z ulikam anatamičnaj łohiki», — patłumačyŭ Marajes.
Paśla zaviaršeńnia madeli tvar dapoŭnili pryčoskaj i adzieńniem u styli XVIII stahodździa.
Atrymanaje abličča padobnaje da dvuch pryžyćciovych vyjaŭ Mocarta: niezavieršanaha partretu 1783 hoda, jaki žonka kampazitara Kanstancyja ličyła najbolš dakładnym, i nakidam 1789 hoda, vykananym Doraj Askajł.
«U pracesie pracy my nie vykarystoŭvali partrety dla madelavańnia, a paraŭnali ich užo paśla zaviaršeńnia. Vynik akazaŭsia na dziva dakładny», — adznačyŭ Marajes.
Čerap byŭ vyniaty z mahiły praz 10 hadoŭ paśla śmierci Mocarta mahilščykam, jaki zapomniŭ jahonuju biezymiannuju mahiłu. Adnak jahonaja sapraŭdnaść dahetul vyklikaje sprečki. Niekatoryja daśledavańni paćviardžajuć adpaviednaść jahonych charaktarystyk partretam, ale pramych dokazaŭ hetaha niama.
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary