Eks-redaktarcy «Novaha času» Aksanie Kołb źbirajucca zavočna zamianić pakarańnie z «chimii» na bolš strohaje
Byłaja redaktarka «Novaha Času» atrymała pozvu ŭ sud Vałožynskaha rajona. 19 sakavika jaje vyklikajuć «u jakaści asudžanaj» pa pradstaŭleńni miascovaha RAUS «ab zamienie pryznačanaha pakarańnia bolš strohim». Aksanie Kołb u 2022 hodzie pryznačyli 2,5 hady chimii, paśla prysudu jana akazałasia časova volnaj i pakinuła Biełaruś, nahadvaje «Novy čas».
«Pozva na 19 sakavika — heta praciah jašče toj spravy 2022 hoda, — kaža Aksana Kołb u kamientary BAŽ. — Miarkuju, što heta nie inicyjatyva vałožynskich orhanaŭ, chutčej za ŭsio, im spuścili źvierchu. Jany ž jašče ŭvosień 2022 hoda viedali, što ja źjechała z krainy. Bo prasili dasłać im papierku, jakaja paćviardžaje, što ja znachodžusia ŭ Polščy i nie treba mianie ŭ Biełarusi šukać. Prośba ad milicyi źjaviłasia paśla taho, kali ja nie pryjšła stać na ŭlik. 19 sakavika, ja tak razumieju, sud za «parušeńni» zamienić maje dva z pałovaj hady «chimii» na kałoniju».
Jak paviedamiła Aksana Kołb, naprykancy 2024 hoda na jaje zaviali jašče adnu kryminalnuju spravu.
Žurnalistka kaža, što nie viedaje padrabiaznaściaŭ pra novy kryminalny pieraśled na radzimie: «Mianie šukali ŭ śniežni 2024-ha — pytalisia pa adrasie majoj rehistracyi, ci nie źjaviłasia ja raptam. Sprava zaviedzienaja Śledčym kamitetam u Breście nibyta «za dyskredytacyju» i «sadziejničańnie ekstremisckaj dziejnaści». Dakładnaj infarmacyi nakont matyvaŭ adkryćcia hetaj spravy, artykułaŭ, sutnaści abvinavačańniaŭ u mianie niama. Choć tym, chto mianie šukaŭ, dali moj polski kantakt — chacieli b, to źviazalisia b».
Na dumku Aksany Kołb, paśla taho, jak ułady prymuć mierkavanyja papraŭki da Kryminalnaha kodeksa, jakija dazvolać zavočnyja sudy pa dadatkovych artykułach, to budzie i zavočny praces. «Pakul što šukajuć. U miždziaržaŭnaj bazie vyšuku ja ŭžo hod jak značusia. Niejak na adras jurasoby, jakaja vydavała «Novy Čas», dasłali prośbu skłaści charaktarystyku na mianie — sa śpisam spahnańniaŭ, zaachvočvańniaŭ i ŭvohule z raspoviedam pra maju asobu. Była ŭ mianie, kaniešnie, spakusa napisać samoj na siabie charaktarystyku, ale ŭstrymałasia ad marnavańnia času», — raspaviała Aksana Kołb.
Na pasadzie hałoŭnaj redaktarki niezaležnaj ahulnanacyjanalnaj haziety «Novy Čas» Aksana Kołb prapracavała bolš za vosiem hadoŭ. Była druhim kiraŭnikom vydańnia paśla zasnavalnika haziety Alaksieja Karala.
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary