Demakratyčnaja Respublika Konha i Ruanda padpisali ŭ kabiniecie Trampa mirnaje pahadnieńnie
Demakratyčnaja Respublika Konha i Ruanda padpisali mirnaje pahadnieńnie pry pasiarednictvie ZŠA, jakoje maje pakłaści kaniec 30-hadovamu kanfliktu na ŭschodzie DRK. Cyrymonija padpisańnia adbyłasia 27 červienia 2025 hoda ŭ Biełym domie ŭ prysutnaści prezidenta ZŠA Donalda Trampa, jaki pieradaŭ padpisany dakumient ministru zamiežnych spraŭ DRK. Na padziei taksama prysutničaŭ kiraŭnik MZS Ruandy, piša Euronews.
Donald Tramp nazvaŭ pahadnieńnie «novym raździełam nadziei i miru» i nahadaŭ, što raniej jon sadziejničaŭ pieramirju pamiž Indyjaj i Pakistanam, Izrailem i Iranam. Pa jaho słovach, ciapier «hvałtu i razbureńniam kaniec, pačynajecca pieryjad harmonii i raźvićcia».
Pahadnieńnie bazujecca na pryncypach, uzhodnienych u krasaviku hetaha hoda, i ŭklučaje abaviazacielstvy ab pavažańni terytaryjalnaj cełasnaści, spynieńni bajavych dziejańniaŭ i admovie ad padtrymki ŭzbrojenych hrupovak, uklučajučy «Demakratyčnyja siły vyzvaleńnia Ruandy».
Dziaržaŭny akratar ZŠA Marka Rubia padkreśliŭ, što choć heta važny krok, jašče šmat treba zrabić. Ministarka zamiežnych spraŭ DRK Tereza Kajikvamba Vahnier adznačyła, što klučavuju rolu ŭ pieramovach adyhraŭ Katar i što biez vyrašeńnia prablem biaśpieki, pravoŭ ludziej i viartańnia dziaržaŭnaha kantrolu niemahčyma havaryć pra ekanamičnaje raźvićcio.
Ministr zamiežnych spraŭ Ruandy Aliŭje Nduchunhireche padziakavaŭ Trampu za lidarstva i paprasiŭ ZŠA sačyć za vykanańniem damoŭlenaściaŭ. Jon adznačyŭ, što heta pahadnieńnie — šaniec dla sumiesnaj pracy dźviuch krain, bo rehijon bahaty na karysnyja vykapni i maje patencyjał dla transhraničnaj handlovaj supracy.
Ekśpierty adznačajuć, što damoŭlenaść adkryvaje šlach dla inviestycyj va ŭschodnija rehijony Demakratyčnaj Respubliki Konha, bahatyja na pryrodnyja resursy. Ale niekatoryja z paŭstanckich hrupovak užo zajavili, što nie ličać siabie abaviazanymi vykonvać pahadnieńnie. Tramp papiaredziŭ, što ŭ vypadku jaho parušeńnia buduć «žorstkija sankcyi».
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy74
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi33
Kamientary
Mirnoje sohłašienije dołžno byť obosnovannym.