«Jandeks» rychtujecca pieranieści masavuju vytvorčaść razumnych televizaraŭ z Kitaja ŭ Biełaruś
Biełaruskija śpiecyjalisty ŭžo vučacca ŭ Kitai.
«Jandeks» pačaŭ vypusk «razumnych» televizaraŭ sieryi «TV Stancyja» z hałasavym pamočnikam «Alisa» na zavodzie H-tv u Minsku. Jak paviedamlaje Forbes, rasijanie inviestavali 2 miljony dołaraŭ u novyja rabatyzavanyja vytvorčyja linii.
Zavod H-tv uvachodzić u skład biełaruskaha H-holding, viadomaha taksama pad brendam «Haryzont». Na zavodach chołdynha, u tym liku H-tv, źbirajucca televizary pad roznymi brendami, siarod jakich Dexp, Harper, Hartens, a ciapier i «Jandeks».
U červieni na pradpryjemstvie była vypuščana testavaja partyja z 230 televizaraŭ, jakija ŭžo pastupili ŭ prodaž, piša vydańnie. Z žniŭnia vytvorčaść budzie pieraniesiena na novyja kanviejery.
Pavodle namieśnika dyrektara H-tv Mikałaja Mana, pradpryjemstva stanie tolki placoŭkaj dla zborki, a ŭsim inšym (u tym liku prasoŭvańniem i prodažami) budzie zajmacca «Jandeks».
Pres-słužba «Jandeksa» kaža pra supracoŭnictva z roznymi vytvorcami, placoŭki dla zborki mohuć varjiravacca.
Na zavodzie H-tv u Minsku rychtujuć novuju vytvorčuju placoŭku ź dźviuma rabatyzavanymi kanviejernymi linijami pa zborcy televizaraŭ. Pavodle namieśnika dyrektara H-tv Mikałaja Mana, kožnaja linija patrabuje ŭsiaho 12 supracoŭnikaŭ u źmienu zamiest zvyčajnych 38.
Biełaruskija śpiecyjalisty prajšli navučańnie ŭ Kitai, kab paśla nie tolki pracavać, ale i navučać inšych. Vypusk televizaraŭ «Jandeksa» na novaj placoŭcy aceńvajecca ŭ sotni tysiač štuk na hod. H-tv hatovy pavialičyć svoj ahulny vypusk z 3 młn da 7 młn televizaraŭ na hod. Pryrost mahutnaści chočuć zabiaśpiečać nie tolki dziakujučy televizaram «Jandeksa», ale i inšych brendaŭ, kaža Man.
Pieranos vytvorčaści z Kitaja ŭ Biełaruś, akramia łahistyčnych pieravah, daść «Jandeksu» mahčymaść sekanomić na mytnych zborach, piša vydańnie.
Kamientary