U 18-m pakiecie sankcyj — čatyry biełaruskija kampanii i zavod «Lehmaš», praduhledžvajucca zachady suprać biełaruskich bankaŭ
U piatnicu 18 lipienia krainy ES padpisali novy pakiet sankcyj suprać Rasii i Biełarusi z-za vajny va Ukrainie, u tym liku panižeńnie abmiežavańnia cenaŭ na ekspart nafty z Rasii.
«ES tolki što ŭchvaliŭ adzin sa svaich samych mocnych na siońniašni dzień pakietaŭ sankcyj suprać Rasii», — zajaviła kiraŭnica źniešniaj palityki ES Kaja Kałas.
«My jašče bolš skaračajem vajenny biudžet Kramla, pieraśledujem jašče 105 karabloŭ cieniavoha fłotu, ich pastaŭščykoŭ i abmiažoŭvajem dostup rasijskich bankaŭ da finansavańnia.
Trubapravody «Paŭnočny patok» buduć zabaronienyja, adbudziecca panižeńnie abmiežavańnia cen na naftu.
My akazvajem bolšy cisk na rasijskuju vajennuju pramysłovaść, kitajskija banki, jakija dazvalajuć abychodzić sankcyi, i błakujem ekspart technałohij, što vykarystoŭvajucca ŭ bieśpiłotnikach», — adznačyła Kaja Kałas.
Pad sankcyi trapiŭ najbujniejšy naftapierapracoŭčy zavod «Rasnafty» ŭ Indyi, jany taksama zakranuli tych, chto zajmajecca ideałahičnaj apracoŭkaj ukrainskich dziaciej na akupavanych terytoryjach.
«My budziem praciahvać pavyšać košt ahresii, kab jaje spynieńnie stała adzinym šlacham dla Maskvy», — zajaviła Kałas.
18-y pakiet sankcyj ES suprać Rasii taksama ŭklučaje novuju zabaronu na tranzakcyi, źviazanyja z hazapravodami «Paŭnočny patok» i «Paŭnočny patok-2», a taksama panižeńnie abmiežavańnia cen na rasijskuju syruju naftu ŭ miežach G7 pryblizna da 47,6 dołara za barel, paviedamili ahienctvy sa spasyłkaj na dackaha dypłamata.
18-y pakiet sankcyj praduhledžvaje taksama sankcyi suprać biełaruskich bankaŭ i pradpryjemstvaŭ vajenna-pramysłovaha kompleksu.
U padrychtavanym pakiecie fihurujuć čatyry biełaruskija kampanii, što dziejničajuć u halinie abarony i vajennaj pramysłovaści. Jeŭrakamisija prapanuje zamarozić ich aktyvy i zabaranić viadzieńnie biźniesu na terytoryi ES.
Pavodle dakumientaŭ, da jakich atrymała dostup «Radyjo Svaboda», adnym z pradpryjemstvaŭ, što trapić u sankcyjny śpis, stanie aršanski zavod «Lehmaš».
Aljans rasślednikaŭ Biełarusi jašče ŭ traŭni 2024 hoda zajaviŭ, što hety zavod moža pracavać na rasijskuju vajskovuju pramysłovaść — vyrablać detali snaradaŭ dla rasijskich sistem załpavaha ahniu BM-21 «Hrad». ZŠA ŭviali sankcyi suprać pradpryjemstva ŭ žniŭni 2024 hoda. Paźniej «Lehmaš» trapiŭ pad sankcyi Kanady i Vialikabrytanii.
Akramia ŭklučeńnia novych pradpryjemstvaŭ, Jeŭrakamisija prapanavała pašyryć siektaralnyja abmiežavańni dla Biełarusi. Siarod ich — poŭnaja zabarona na apieracyi ź biełaruskimi bankaŭskimi strukturami (raniej jana tyčyłasia tolki finansavych paviedamleńniaŭ — SWIFT), ciapier heta pieraŭtvarajecca ŭ poŭnuju zabaronu tranzakcyj.
Taksama ŭpieršyniu pad zabaronu traplaje impart uzbrajeńniaŭ ź Biełarusi ŭ ES.
Kab uzmacnić kantrol za abychodam sankcyj, ES prapanuje pašyryć śpis tavaraŭ i technałohij, što mohuć być vykarystany dla ŭmacavańnia biełaruskaj vajskovaj i pramysłovaj bazy. Heta, u pryvatnaści, mašyny, chimikaty, asobnyja vidy mietałaŭ i płastmas. Zabaraniajecca taksama tranzit šerahu tavaraŭ praz terytoryju Biełarusi.
Kamientary