Vy nie pavierycie, z dapamohaj čaho ŭ ZŠA adhaniajuć vaŭkoŭ ad statkaŭ

Šeryja vaŭki źjaŭlajucca prablemaj nie tolki dla Biełarusi, ale i dla ZŠA. Jak piša The Associated Press, hetyja drapiežniki byli amal całkam źniščany na zachadzie krainy jašče ŭ pačatku XX stahodździa. Adnaŭleńnie papulacyi adbyłosia niekalki dziesiacihodździaŭ nazad, i toje, što dla ekołahaŭ stała vialikim pośpiecham, dla fiermieraŭ pieratvaryłasia ŭ hałaŭny bol i ekanamičnyja straty. Šery voŭk paśpiachova paluje na chatnich žyvioł.

U pošukach abarony ad drapiežnika fiermiery vyprabavali roznyja srodki — elektraaharodžy, vartavych sabak, konnyja patruli, adłoŭ i pieramiaščeńnie. Ale ŭsio heta pakazała nizkuju efiektyŭnaść. U niekatorych štatach pajšli jašče dalej dazvoliŭšy adstreł vaŭkoŭ.

Fiermiery atrymlivajuć kampiensacyju, kali mohuć dakazać, što voŭk zabiŭ ich žyviołu. Ale jość i niekampiensavanyja vydatki — napałochanyja karovy horš razmnažajucca, miasa stanovicca bolš žorstkim.

Muzyka suprać drapiežnikaŭ

Kab paźbiehnuć pašyreńnia kryvavaha scenaru, bijołahi z Słužby inśpiekcyi zdaroŭja žyvioł i raślin Ministerstva sielskaj haspadarki ZŠA prapanavali inšy padychod: vykarystoŭvać drony z dynamikami i ciepłavizarami.

Papiaredniaje daśledavańnie, apublikavanaje ŭ 2022 hodzie, pakazała, što vykarystańnie hukaŭ čałaviečych hałasoŭ praz hučnahavaryciel, ustalavany na bieśpiłotniku, moža napałochać drapiežnikaŭ.

Unačy, kali vaŭki asabliva aktyŭnyja, aparaty nie tolki sočać za statkami, ale i raspaŭsiudžvajuć huki, jakija pałochajuć drapiežnikaŭ. Asabliva mocny efiekt majuć pieśni hurta AC/DC, u tym liku znakamitaja Thunderstruck.

U arsienale taksama ciažki mietał ad Five Finger Death Punch, huki strełaŭ, fiejervierkaŭ i navat dyjałohi ź filma «Šlubnaja historyja» (Marriage Story). Skarlet Jochansan u krytyčnym momancie kryčyć: «I am not putting up with this anymore!» (Ja nie źbirajusia bolš z hetym mirycca!) — i vaŭki raźbiahajucca.

«Na samaj spravie jany lohka pałochajucca ŭsiaho novaha i nieznajomaha», — tłumačyć Amarok Vajs z Centra bijaraznastajnaści.

Cana i pierśpiektyvy

Fiermiery taksama zaŭvažyli vynik. Praŭda, jany vykazvajuć zaściarohi, što vaŭki ź ciaham času zrazumiejuć, što drony nie mohuć im naškodzić. Adnak ekałahičnyja aktyvisty aptymistyčna nastrojeny nakont bieśpiłotnikaŭ, bo jany dazvalajuć pałochać vaŭkoŭ roznymi sposabami i ŭ roznych miescach.

U novaj technałohii jość istotny minus. Adzin dron ź ciepłavizaram i hučnahavarycielem kaštuje kala 20 tysiač dalaraŭ, patrabuje padrychtavanych piłotaŭ i pracuje horš u lasistaj miascovaści. Dla mnohich nievialikich haspadarak heta prosta zanadta doraha.

Tym nie mienš u Słužbie inśpiekcyi zdaroŭja žyvioł i raślin ličać, što drony mohuć stać važnaj alternatyvaj masavamu adstrełu vaŭkoŭ. Kali košt źnizicca, fiermiery zmohuć šyrej ich vykarystoŭvać.

«Pakul heta ekśpierymient, ale jon užo pakazvaje vynik», — kaža supracoŭnik Słužby inśpiekcyi zdaroŭja žyvioł i raślin Poł Vulf i zhadvaje adzin z vypadkaŭ: voŭk spačatku tolki ź cikavaściu naziraŭ za dronam, pakul piłot nie źviarnuŭsia da jaho praz dynamik: «Hej, voŭk, preč adsiul!». Paśla hetaha drapiežnik adrazu kinuŭ žyviołu i ŭciok.

• 1
• 0
• 6
• 2
• 0
• 0
• 2
• 0