Makron abjaviŭ pra hatoŭnaść 26 krain nakiravać svaje vojski va Ukrainu
Prezident Francyi Emanuel Makron paviedamiŭ, što paśla sustrečy «Kaalicyi achvotnych» 26 dziaržaŭ vykazali hatoŭnaść nakiravać svaje vojski va Ukrainu abo padtrymlivać takuju misiju. Havorka idzie pra miratvorčuju prysutnaść, jakaja pačniecca paśla spynieńnia ahniu abo padpisańnia mirnaha pahadnieńnia, piša The Moscow News.
«Hetyja 26 krain pahadzilisia nakiravać vojski va Ukrainu ŭ jakaści siły harantyi albo zabiaśpiečyć prysutnaść na ziamli, na mory abo ŭ pavietry. Meta — padtrymka Ukrainy i jaje terytoryi na nastupny dzień paśla zakančeńnia bajavych dziejańniaŭ», — skazaŭ francuzski lidar.
Jon padkreśliŭ, što misija nie praduhledžvaje vajennych dziejańniaŭ suprać Rasii, a nakiravanaja na ŭmacavańnie miru i nakiravańnie stratehičnaha sihnału. Raźmiaščeńnie vojskaŭ płanujecca nie na froncie, a ŭ śpiecyjalnych zonach.
Akramia taho, jeŭrapiejskija lidary damovilisia z ZŠA pra mahčymaje ŭviadzieńnie dadatkovych sankcyj suprać Rasii ŭ vypadku pieraškod u dasiahnieńni mirnych pahadnieńniaŭ.
Makron taksama paviedamiŭ pra šyrejšuju inicyjatyvu pa harantyjach biaśpieki dla Ukrainy, da jakoj dałučylisia 35 krain. U apošnija miesiacy kiraŭniki štaboŭ i ministry abarony kaalicyi ŭzajemadziejničali z ZŠA i NATA dla padrychtoŭki misii.
Asnoŭnaj umovaj harantyj biaśpieki Makron nazvaŭ zachavańnie va Ukrainie paŭnavartasnaj armii biez abmiežavańniaŭ pa kolkaści i ŭzbrajeńniach. Pieršy elemient harantyj — umacavańnie Uzbrojenych sił Ukrainy, druhi — siły biaśpieki sajuźnikaŭ, hatovyja da razhortvańnia.
Raniej hienieralny sakratar NATA Mark Rute zajaviŭ, što Rasija nie maje prava vyznačać umovy raźmiaščeńnia zachodnich vojskaŭ va Ukrainie, a rašeńnie pra heta prymaje tolki Kijeŭ. ZŠA padtrymlivajuć misiju, ale nie płanujuć adpraŭlać svaje vojski.
Ciapier čytajuć
Hrodzienskaha padletka adpravili ŭ škołu ŭ Litvu — jon vyvučyŭ litoŭskuju i ciapier pierakładaje ŭ Jeŭraparłamiencie. Pierakładaŭ jon i Cichanoŭskich6
Kamientary