Były palitviazień Pavieł Vinahradaŭ: Ja małady, zdarovy i poŭny sił, adzinaje, što niepakoić — zuby i vočy
«Kali nadzieli miašok na hałavu i kudyści pavieźli, ja zrazumieŭ, što vychodžu. Tolki nie viedaŭ, što siudy», — zajaviŭ žurnalistam palitźniavoleny Pavieł Vinahradaŭ, vyzvaleny i vyviezieny ŭ Vilniu 11 vieraśnia razam ź inšymi 50 viaźniami, piša «Pozirk».
Pavodle słoŭ Vinahradava, paśla vyzvaleńnia Siarhieja Cichanoŭskaha ŭ červieni jon čakaŭ, što vypuściać i jaho.
«Ciapier mnie padviazuć kańjak, ja jaho vypju i budu słuchać, što tut adbyvajecca, chto z kim, chto suprać kaho siabruje. Budzie, ja dumaju, mnie vielmi cikava», — skazaŭ Vinahradaŭ.
Ciapier 37-hadovy aktyvist byŭ zatrymany 22 śniežnia 2021 hoda. 16 sakavika 2022 hoda pryhavorany da 5 hadoŭ pazbaŭleńnia voli pa troch artykułach Kryminalnaha kodeksa: 130 (raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varažniečy), 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich) i 367 (paklop u dačynieńni da Łukašenki).
U červieni 2022 hoda Vinahradaŭ byŭ uklučany ŭ śpis asob, jakija majuć dačynieńnie da terarystyčnaj dziejnaści. U lipieni taho ž hoda ŭ jaho znajšli plamu ŭ lohkich, kurs antybijotykaŭ, jak paviedamlali pravaabaroncy, nie prynios vyniku. U palitviaźnia byŭ dyjahnastavany suchoty, jon schudnieŭ na 36 kh. U siaredzinie lutaha 2023 hoda stała viadoma pra jaho vyzdaraŭleńnie. Za «parušeńni režymu» Vinahradava źmiaščali ŭ štrafny izalatar i pamiaškańnie kamiernaha typu.
«Majo zdaroŭje značna lepšaje, čym u 2022 hodzie — na ździŭleńnie. U hetym płanie, kankretna ŭ maim vypadku, pienitencyjarnaja sistema spracavała vydatna. Ja schudnieŭ, žonka zadavolenaja maim źniešnim vyhladam, jašče, moža, napiša padziačny list u DVP (Departamient vykanańnia pakarańniaŭ MUS)», — iranična vykazaŭ mierkavańnie Vinahradaŭ u kamientary ŚMI.
«Adzinaje, — udakładniŭ jon, — zuby i vočy. Moža, pakul siadzieŭ u izalatarach, paškodziŭ troški śpinu i šyju — spaŭ na drevie abo na plitcy. Karaciej, narmalna ŭsio. Mnie 37.Ja małady, zdarovy i poŭny sił».
Aktyvist paviedamiŭ, što čakaje pryjezdu žonki, «ale, na žal, heta niemahčyma ŭ dadzieny momant». «Tamu jana pryjedzie jak-niebudź chutka, ja spadziajusia. Pavinna było być u mianie spatkańnie, jak raz sud dazvoliŭ, z synam, jakoha nie bačyŭ z 2021 hoda, ale, mabyć, sustreniemsia ŭžo tut, u Jeŭrasajuzie», — skazaŭ Vinahradaŭ.
Vyzvaleny žurnalist Pavieł Mažejka: My ŭsie ŭ kałonii bačyli dopis Trampa
Poŭny śpis 52 vyzvalenych palitviaźniaŭ
«Užo nie ŭ turmie, ale nie mahu skazać, što na voli». Uładzimir Mackievič napisaŭ pieršy post paśla vyzvaleńnia
Viazień sumleńnia Dźmitryj Kazłoŭ (błohier Šery Kot) da i paśla vyzvaleńnia FOTAFAKT
Voś jak u Vilni sustrakali vyzvalenych palitviaźniaŭ ŠMAT FOTA
U Vilni siońnia praviaduć pres-kanfierencyju z udziełam vyzvalenych palitviaźniaŭ
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča12
Kamientary