Tramp spadziajecca na dapamohu Kitaja dla zakančeńnia vajny va Ukrainie
Prezident ZŠA zajaviŭ, što padčas svajoj chutkaj sustrečy ź lidaram Kitaja Si Czińpinam spadziajecca abmierkavać sposaby zakančeńnia vajny va Ukrainie.
Tramp hutaryŭ z žurnalistami na borcie prezidenckaha samalota, jaki nakiroŭvajecca ŭ Aziju, dzie kiraŭnik Biełaha doma maje namier pravieści piać dzion. Jon naviedaje Małajziju, Japoniju i Paŭdniovuju Kareju, a taksama voźmie ŭdzieł u sustrečy Asacyjacyi dziaržaŭ Paŭdniova-Uschodniaj Azii (ASIEAN), jakaja ŭ niadzielu pačynajecca ŭ Kuała-Łumpury, paviedamlaje Bi-bi-si.
Trampa spytali, ci spadziajecca jon na dapamohu Kitaja ŭ pytańni ŭrehulavańnia rasijska-ukrainskaj vajny.
«My b chacieli, kab Kitaj nam dapamoh z Rasijaj, — adkazaŭ prezident ZŠA. — My ŭviali suprać Rasii vielmi vialikija sankcyi. Ja dumaju, hetyja sankcyi buduć mieć vielmi abaviazkovuju siłu. Ale ja chacieŭ by, kab Kitaj nam dapamoh».
Padčas niadaŭniaha samitu ES u Brusieli prezident Ukrainy Uładzimir Zialenski zajaviŭ, što Kitaj nie zacikaŭleny ŭ pieramozie Kijeva i paražeńni Maskvy.
Žurnalisty taksama spytali Trampa, ci nie baicca jon, što ŭviedzienyja im suprać Rasii sankcyi pryviaduć da eskałacyi z boku prezidenta Rasii Uładzimira Pucina.
«Ja tak nie dumaju. Jon ža kazaŭ, što jany nie buduć mieć takoha ŭžo vialikaha ŭpłyvu. Jon tak kaža. Ja nie dumaju, što jon maje racyju ŭ hetym pytańni. Pabačym, što budzie. Ja dumaju, što jon taksama choča heta skončyć», — adkazaŭ prezident ZŠA.
Ciapier čytajuć
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy12
Kamientary