Aktyvy zbankrutavanaj «Biełryby» pierajšli da firmy, blizkaj da siamji Łukašenki
Na biełaruskim rynku ryby adbyŭsia pieradzieł: aktyvy zbankrutavanaj «Biełryby» pierajšli da kampanii «Marskaja havań», jakaja źviazana ź blizkaj da siamji Łukašenki Ludmiłaj Niaronskaj. Pra heta paviedamlajecca ŭ spravazdačy kampanii «Kolijerz», zaŭvažyła «Lusterka».
Kampanija «Marskaja havań», zarehistravanaja ŭ Minsku ŭ śniežni 2024 hoda, nabyła ŭłasnaść «Biełryby» — vytvorčyja pamiaškańni na vulicach Ściebianiova i Radyjalnaj. Ahulnaja płošča majomaści — 24 tysiačy kvadratnych mietraŭ. Suma ździełki skłała 2,9 miljona dołaraŭ — heta samaja darahaja kupla ŭ śfiery vytvorča-składskoj nieruchomaści za treci kvartał.
Kampanijaj kiruje Ludmiła Niaronskaja, siabroŭka Viktara i Lilii Łukašenkaŭ. Za apošnija hady źviazanyja ź joj firmy aktyŭna pašyrajuć upłyŭ u rybnaj halinie, što, pavodle rasśledavalnikaŭ, prynamsi častkova tłumačycca jaje suviaziami z najbolš upłyvovaj siamjoj krainy.
Niaronskaja płanuje adkryć rybapierapracoŭčy kompleks u SEZ «Minsk», a taksama maje dačynieńnie da kampanij «Marskija siezony», «Marskija promysły» i «BiełMare Hrup». U struktury jaje biznesu pracujuć ziać Alaksandra Łukašenki Dźmitryj Dziatłaŭ i jaho ŭnuk — Alaksandr Łukašenka-małodšy, jaki vałodaje dolaj u kampanii «Siezon upakoŭki».
Što da zbankrutavanaj «Biełryby», to adno z najstarejšych pradpryjemstvaŭ haliny, zasnavanaje jašče ŭ 1950‑ia hady, na praciahu apošniaha dziesiacihodździa pracavała sa stratami. Prablemy abvastrylisia ŭ 2022 hodzie, kali zavod sprabavaŭ abviaścić siabie bankrutam. Častki pradpryjemstva niekalki razoŭ pieradavali roznym strukturam, ale heta nie dapamahło.
U 2024 hodzie rabotniki pierajemnika «Biełryby» — rybakansiervavaha kambinata «Staličny» — skardzilisia na piacimiesiačnyja zatrymki zarobkaŭ. Paśla ŭmiašańnia ŭładaŭ hrošy vypłacili, ale ŭ 2025 hodzie kambinat taksama pačaŭ praceduru bankructva — patrabavańni kredytoraŭ pieravysili 1,5 miljona rubloŭ.
Kamientary
(I takich syrych niedapracovak uvohule davoli šmat.)
Siamiejstva Vici Łukašenki nie vielmi šyfrujecca asabliva ŭ pytańniach kradziažu dziaržaŭnaj ziamli i nieruchomaści jašče z časoŭ, kali ŭ 2014 hodzie Dana Chołdynhz, u kiraŭnictvie jakoj Lilija Łukašenka zajmała vysokuju pasadu, atrymała ad Łukašenki-starejšaha na biesprecedentna ilhotnych umovach terytoryju staroha aeraporta ŭ Miensku pad kamiercyjnuju zabudovu i ŭ dadatak ledź nie afšornyja padatkavyja ŭmovy. A jak vy dumali - u AAE z šejchami u VIP-łožach trassy Formuły-1 hienierał Vicia Łukašenka tusujecca z žabrackaha ŭ try tysiačy z hakam baksaŭ zarobku na pasadzie kiraŭnika NAK?