Fizik z Akademii navuk pierajechaŭ na pracu ŭ Polšču. Padčas vizitu ŭ Biełaruś jaho aryštavali za palityku i kinuli ŭ kałoniju
Pavieł Špak maje stupień kandydata fizika-matematyčnych navuk. Dva hady tamu jon znajšoŭ pracu ŭ Polščy i atrymaŭ pracoŭny VNŽ, ale čas ad času jeździŭ dadomu. Padčas adnoj z pajezdak jaho zatrymali.
Paŭłu Špaku 40 hadoŭ. Jon navukoviec-fizik. U 2007 hodzie Pavieł skončyŭ mahistraturu Biełaruskaha dziaržaŭnaha ŭniviersiteta pa śpiecyjalnaści «Łaziernaja fizika», a paźniej — aśpiranturu. U 2017 hodzie jon atrymaŭ navukovuju stupień kandydata fizika-matematyčnych navuk.
Amal 16 hadoŭ (z 2007 pa 2023 hod) mužčyna pracavaŭ u Instytucie fiziki Nacyjanalnaj akademii navuk Biełarusi, prajšoŭšy šlach ad małodšaha navukovaha supracoŭnika da daśledčyka. U jaho navukovym partfolia — 33 publikacyi i ŭdzieł u raspracoŭcy łaziernych sistem, optaelektroniki i daśledavańniaŭ kambinatornaha raśsiejańnia śviatła.
U mai 2023 hoda Pavieł kardynalna źmianiŭ žyćcio: jon pierajechaŭ u Varšavu i pierajšoŭ u pryvatny siektar. Apošnim časam jon pracavaŭ mieniedžaram pa raźvićci prajektaŭ u kampanii OEM Tech LLC, jakaja zajmajecca łaziernymi technałohijami. U sacsietkach jon pisaŭ, što žyvie ŭ Polščy, atrymaŭ pracoŭny VNŽ i vučyć polskuju movu. Ale pieryjadyčna jeździŭ dadomu.
Apošni raz jon byŭ aktyŭny ŭ sacsietkach kala vaśmi miesiacaŭ tamu. Jaho zatrymali padčas čarhovaha viartańnia ŭ Biełaruś.
Stała viadoma, što Paŭła asudzili ŭ Minskim haradskim sudzie. Jaho pryznali vinavatym pavodle dvuch artykułaŭ Kryminalnaha kodeksa: «arhanizacyja i padrychtoŭka dziejańniaŭ, jakija hruba parušajuć hramadski paradak» (č. 1 art. 342) i «raspalvańnie varožaści» (č. 1 art. 130).
Prysud ustupiŭ u siłu naprykancy listapada 2025 hoda. Padrabiaznaści spravy i termin pakarańnia nieviadomyja. Paŭłu pahražała da piaci hadoŭ niavoli. Ciapier jon zastajecca za kratami.
«Naša Niva» — bastyjon biełaruščyny
PADTRYMAĆCiapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary