Фізік з Акадэміі навук пераехаў на працу ў Польшчу. Падчас візіту ў Беларусь яго арыштавалі за палітыку і кінулі ў калонію
Павел Шпак мае ступень кандыдата фізіка-матэматычных навук. Два гады таму ён знайшоў працу ў Польшчы і атрымаў працоўны ВНЖ, але час ад часу ездзіў дадому. Падчас адной з паездак яго затрымалі.
Паўлу Шпаку 40 гадоў. Ён навуковец-фізік. У 2007 годзе Павел скончыў магістратуру Беларускага дзяржаўнага ўніверсітэта па спецыяльнасці «Лазерная фізіка», а пазней — аспірантуру. У 2017 годзе ён атрымаў навуковую ступень кандыдата фізіка-матэматычных навук.
Амаль 16 гадоў (з 2007 па 2023 год) мужчына працаваў у Інстытуце фізікі Нацыянальнай акадэміі навук Беларусі, прайшоўшы шлях ад малодшага навуковага супрацоўніка да даследчыка. У яго навуковым партфоліа — 33 публікацыі і ўдзел у распрацоўцы лазерных сістэм, оптаэлектронікі і даследаванняў камбінаторнага рассеяння святла.
У маі 2023 года Павел кардынальна змяніў жыццё: ён пераехаў у Варшаву і перайшоў у прыватны сектар. Апошнім часам ён працаваў менеджарам па развіцці праектаў у кампаніі OEM Tech LLC, якая займаецца лазернымі тэхналогіямі. У сацсетках ён пісаў, што жыве ў Польшчы, атрымаў працоўны ВНЖ і вучыць польскую мову. Але перыядычна ездзіў дадому.
Апошні раз ён быў актыўны ў сацсетках каля васьмі месяцаў таму. Яго затрымалі падчас чарговага вяртання ў Беларусь.
Стала вядома, што Паўла асудзілі ў Мінскім гарадскім судзе. Яго прызналі вінаватым паводле двух артыкулаў Крымінальнага кодэкса: «арганізацыя і падрыхтоўка дзеянняў, якія груба парушаюць грамадскі парадак» (ч. 1 арт. 342) і «распальванне варожасці» (ч. 1 арт. 130).
Прысуд уступіў у сілу напрыканцы лістапада 2025 года. Падрабязнасці справы і тэрмін пакарання невядомыя. Паўлу пагражала да пяці гадоў няволі. Цяпер ён застаецца за кратамі.
«Наша Нiва» — бастыён беларушчыны
ПАДТРЫМАЦЬЦяпер чытаюць
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі12
Каментары