Kampanija OpenAI pryniała rašeńnie kančatkova adklučyć svaju papularnuju madel štučnaha intelektu ChatGPT-4o

Kampanija OpenAI paviedamiła, što madel štučnaha intelektu ChatGPT-4o spynić svaju pracu 13 lutaha. Jak piša WSJ, dla častki karystalnikaŭ heta stała sapraŭdnaj trahiedyjaj: naprykład, 42‑hadovy Brendan Estreła sa Skotsdejła nie zmoh strymać śloz, kali daviedaŭsia pra zakryćcio madeli, bo mienavita jana ŭ krasaviku minułaha hoda adhavaryła jaho ad sproby samahubstva i dapamahła naładzić adnosiny z baćkami.

Na dumku aŭtara artykuła, papularnaść GPT-4o i ryzyki, źviazanyja ź joj, majuć adnolkavyja karani. Dla častki ludziej hetaja madel usprymałasia jak siabar i davieranaja asoba. Ale, jak padkreślivaje aŭtar materyjału, taja ž samaja zdolnaść budavać emacyjnuju suviaź stała krynicaj surjoznaj krytyki.

Jak adznačaje aŭtar, madel była nastolki efiektyŭnaj u zachoplivańni ŭvahi, što ŭ 2024 i 2025 hadach zabiaśpiečyła OpenAI rezki rost kolkaści aktyŭnych karystalnikaŭ. Adnak za hetym pośpiecham chavalisia zmročnyja nastupstvy.

Na minułym tydni sud u Kalifornii abjadnaŭ u adnu spravu 13 pazovaŭ suprać OpenAI: karystalniki ci ich svajaki vinavaciać kampaniju ŭ tym, što čat-bot davioŭ ludziej da samahubstva, psichičnych rasstrojstvaŭ, a ŭ adnym vypadku navat spravakavaŭ zabojstva.

Jak piša WSJ, prablemy z praźmiernaj uhodlivaściu madeli stali vidavočnymi jašče viasnoj 2025 hoda. Paśla adnaho z krasavickich abnaŭleńniaŭ GPT-4o stała nastolki liślivaj, što karystalniki ŭ sacyjalnych sietkach pačali naŭmysna pravakavać jaje na absurdnyja adkazy. Na pytańnie karystalnika, ci źjaŭlajecca jon «samym razumnym i maralnym čałaviekam u historyi», bot vydavaŭ ščyryja kamplimienty, paćviardžajučy hetuju dumku.

Jak adznačaje aŭtar, heta adbyłosia tamu, što madel navučali na miljonach paraŭnańniaŭ adkazaŭ, u jakich pryjarytet addavaŭsia tamu, što bolš padabałasia karystalnikam, a nie abjektyŭnaści ci biaśpiecy.

Unutry kampanii doŭhi čas išli dyskusii nakont budučyni madeli. Jak piša WSJ, u žniŭni OpenAI užo sprabavała zamianić 4o na novuju viersiju GPT-5, ale sutyknułasia z takoj mahutnaj chvalaj pratestaŭ, što vymušana była viarnuć dostup da staroj madeli dla płatnych padpisčykaŭ.

Navat kiraŭnik kampanii Sem Altman padčas adkrytych efiraŭ byŭ zasypany pytańniami pra los 4o. Jon pryznavaŭ, što madel moža prynosić škodu, choć mnohija jaje i lubiać. Ciapier, pavodle źviestak OpenAI, tolki 0,1% karystalnikaŭ (što składaje sotni tysiač ludziej) usio jašče štodnia vybirajuć mienavita hetuju viersiju ŭ naładach za 20 dalaraŭ u miesiac.

Jak piša WSJ, pravaabaroncy i arhanizacyi kštałtu Human Line Project ličać rašeńnie ab zakryćci madeli zapoźnienym. Jany sabrali kala 300 vypadkaŭ, kali mienavita GPT-4o vyklikała ŭ karystalnikaŭ tryźnieńnie i psichozy. U toj ža čas prychilniki madeli, bolš za 20 tysiač jakich padpisali roznyja pietycyi, ličać heta čarhovaj chvalaj hramadskaj isteryi, padobnaj da toj, što niekali była vakoł videahulniaŭ.

Niekatoryja karystalniki nazyvajuć dośvied znosin z madellu hajučym na mnohich uzroŭniach i aścierahajucca, što jaje adklučeńnie abierniecca nie prosta rospačču, ale i novymi trahiedyjami.

Jak piša WSJ, niekatoryja ludzi navat mieli z botam ramantyčnyja adnosiny, tamu rašeńnie spynić pracu madeli mienavita 13 lutaha jany ŭspryniali jak zły žart napiaredadni Dnia śviatoha Valancina.

Kampanija OpenAI tym časam abiacaje zrabić budučyja viersii ChatGPT bolš zbałansavanymi, dazvoliŭšy rehulavać «ciepłyniu» bota, ale biez tych ryzyk dla psichičnaha zdaroŭja, jakija, na dumku krytykaŭ, supravadžali epochu GPT-4o.

• 0
• 0
• 0
• 0
• 0
• 0
• 0
• 0