«Aršanski afšor» dla ŭnuka Łukašenki. Małodšy Alaksandr Łukašenka pabuduje cech za dziaržaŭnyja miljony
Kampanija, źviazanaja ź siamjoj Alaksandra Łukašenki, atrymlivaje dostup da ščodrych dziaržkredytaŭ i padatkovych ilhot. «Biuro» vyśvietliła, jak 21‑hadovy chłopiec i asvojvaje inviestycyjnuju prahramu «Rehijanalnaja inicyjatyva».
Kampanija «Siezon upakoŭki» płanuje budaŭnictva vytvorča-składskoha cecha pa vyrabie tary z hafrakardonu. Prajekt užo ŭklučany ŭ dziaržaŭnuju prahramu «Rehijanalnaja inicyjatyva», jakaja praduhledžvaje vyłučeńnie kredytu na sumu da 30 miljonaŭ rubloŭ.
Miesca dla budoŭli ŭdałaje — asablivaja ekanamičnaja zona «Bremina-Orša». U narodzie hety prajekt achryścili «aršanskim afšoram», bo Łukašenka svaim ukazam stvaryŭ tam asablivyja ŭmovy: vyzvaleńnie ad šerahu padatkaŭ i śpiecyjalnyja mytnyja prefierencyi.
20% «Siezona ŭpakoŭki» naležyć 21‑hadovamu Alaksandru Łukašenku — małodšamu. Astatnimi 80% vałodaje firma «Marskija siezony», jakuju kantraluje biznes-łedzi Ludmiła Niaronskaja — blizkaja siabroŭka Viktara i Lilii Łukašenki.
Akramia taho, u «Marskich siezonach» taksama pracuje ziać Viktara i Lilii Łukašenki — Dźmitryj Dziatłaŭ i svat — Alaksandr Harusaŭ.
Biełaruskija ŭłady ŭžo pryniali miery, kab schavać pośpiechi biznesu. Dadzienyja firmaŭ, źviazanych ź Niaronskaj i siamjoj Łukašenki (u tym liku i «Siezona ŭpakoŭki»), zasakrečanyja. Publičny dostup da ich finansavaj spravazdačnaści i detalaŭ ułasnaści zakryty.
Kamientary
21 hadovy unuk užo paśpiachovy biźniasmien.)) Usia kraina u majomaści uzurpatara. Niekaje siaredniaviečče.
Mianie tolki adno chvaluje. Kali łuki nie stanie, uvieś kłan łukašenak nie paźbieh ad adkaznaści