U asudžanaj na 20 hadoŭ Volhi Majoravaj u kałonii mocna pahoršaŭ zrok
Palitźniavolenaja, byłaja aktyvistka AHP Volha Majorava paviedamiła pra paharšeńnie zdaroŭja i pahrozu svajmu žyćciu. Pra heta Radyjo Svaboda raspaviała byłaja źniavolenaja kałonii №24, jakaja bačyłasia z Volhaj Majoravaj da svajho vyzvaleńnia.
«Jana ŭ vielmi drennym stanie. Pa-pieršaje, pavodle zdaroŭja, bo jana vielmi drenna bačyć i pastupova ŭ kałonii hublaje reštki zroku, užo amal nie bačyć. Pa-druhoje, jak jana kaža, joj pahražajuć, tamu surjozna niepakoicca za svajo žyćcio», — raspaviała pra Majoravu žančyna.
Volha Majorava adbyvaje termin u kałonii № 24 u pasiołku Zarečča Rečycki rajon. Hetaja kałonija pryznačana dla žančyn, jakija ździejśnili bolš jak adno złačynstva, u tym liku tam adbyvajuć terminy recydyvistki. U kałonii palitźniavolenaja atrymała čyrvonuju birku «schilnaj da teraryzmu», praz što jana pazbaŭlena mnohich pravoŭ, u tym liku joj zabaronieny hrašovyja pieravody i pasyłki ź lekami.
Da vyzvaleńnia ŭ lutym 2025 hoda ŭ kałonii № 24 adbyvała pakarańnie Palina Šarenda-Panasiuk. Jana ŭ razmovie sa «Svabodaj» zhadała, što bačyła ŭ kałonii Volhu Majoravu i ŭžo tady jaje stan vyklikaŭ tryvohu.
«Pierasoŭvajecca jana ź ciažkaściu, bo vielmi drenna bačyć. Jana ŭžo piensijanierka, tamu nie pracuje i znachodzicca ŭ atradzie. Ale viedaju, što nijakich hrošaj sa svajoj piensii nie atrymlivaje, materyjalna joj vielmi ciažka», — raskazała pra Majoravu Palina Šarenda-Panasiuk.
Volha Majorava była fihurantkaj spravy Mikałaja Aŭtuchoviča ab teraryźmie. U 2022 hodzie žančynu asudzili da 20 hadoŭ źniavoleńnia pavodle niekalkich artykułaŭ Kryminalnaha kodeksa, uklučajučy artykuł 295 pra «niezakonnyja dziejańni sa zbrojaj».
Spačatku Majorava adbyvała pakarańnie ŭ homielskaj žanočaj kałonii № 4, ale tam na jaje zaviali novuju spravu pavodle artykuła 411 ab «złosnym niepadparadkavańni administracyi», dadali da terminu jašče paŭtara hoda i pieraviali ŭ kałoniju № 24 u Zareččy. Tam jana pačała hublać zrok.
«U jaje katarakta, rubcy, pahroza poŭnaj ślepaty. Jana źviartałasia pa dapamohu, ale miedycynskaja častka kałonii admoviła ŭ lačeńni. Bolš za toje, z-za statusu «terarystki» joj nie pieradajuć leki i miedycynskija banderoli ad rodnych», — letaś paviedamlała pra Volhu Majoravu Volha Zazulinskaja.
Zatrymali čarhovaha čałavieka hoda Viciebščyny, deputata Viciebskaha abłsavieta Dźmitryja Kalahu7
Zatrymali čarhovaha čałavieka hoda Viciebščyny, deputata Viciebskaha abłsavieta Dźmitryja Kalahu
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich1919
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich19
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary