U Maskvie zajavili, što ŭ Kijeva zhody na pieramirje nichto i nie pytajecca. Chapaje i rašeńnia Pucina
Pres-sakratar Kramla Dźmitryj Piaskoŭ zajaviŭ, što prapanavanaje Rasijaj pieramirje da 9 maja źjaŭlajecca adnabakovym rašeńniem Uładzimira Pucina i nie patrabuje jakoj-niebudź reakcyi abo zhody z boku Ukrainy. Jon padkreśliŭ, što heta rašeńnie Rasijaj užo, maŭlaŭ, pryniata i budzie vykonvacca.
U toj ža čas Piaskoŭ dadaŭ, što ŭ Maskvie čakajuć ad Kijeva «niejkaj reakcyi ŭ płanie adekvatnych namieraŭ», choć nie ŭdakładniŭ, što mienavita majecca pad hetym na ŭvazie.
Raniej paviedamlałasia, što padčas telefonnaj razmovy Uładzimira Pucina i Donalda Trampa abmiarkoŭvałasia ideja karotkaterminovaha pieramirja va Ukrainie. Pavodle hetych źviestak, Pucin prapanavaŭ spynić bajavyja dziejańni na pieryjad śviatkavańnia 9 maja, i hetaja ideja nibyta atrymała padtrymku z boku Trampa. Bolš taho — Tramp navat paśla padaŭ hetu ideju jak svaju.
Prezident Ukrainy Uładzimir Zialenski zajaviŭ, što daručyŭ vyvučyć hetuju prapanovu. Jon adznačyŭ, što pakul niezrazumieła, pra što mienavita idzie havorka — pra niekalki hadzin biaśpieki padčas paradu ŭ Maskvie ci pra bolš šyrokaje spynieńnie ahniu.
Zialenski taksama padkreśliŭ, što zamiest karotkich pieramirjaŭ Ukraina vystupaje za bolš doŭhaterminovaje, a lepš za poŭnaje spynieńnie vajny.
Kamientary
[Zredahavana]