SAAZ: Uspyška Eboły nabyła surjoznuju formu

Pavodle dadzienych SAAZ na sieradu, u DR Konha paćvierdžany 344 vypadki zaražeńnia Ebołaj, ź jakich 60 skončylisia śmierciu. U susiedniaj Uhandzie paćvierdžany dzieviać vypadkaŭ zachvorvańnia i adna śmierć, a taksama zafiksavany adzin mierkavany vypadak zaražeńnia.

Hienieralny dyrektar SAAZ Tedras Adchanam Hiebreisus zajaviŭ, što mižnarodnaja supolnaść usio jašče adstaje ad raźvićcia epidemii.

«Uspyška nabyła surjoznuju formu, i my pa-raniejšamu dahaniajem situacyju. Ale pad kiraŭnictvam urada DR Konha nam pastupova ŭdajecca nahnać upuščanaje», — skazaŭ jon na pres-kanfierencyi.

Kiraŭnik SAAZ taksama zaklikaŭ krainy, jakija ŭviali abmiežavańni na pajezdki ŭ suviazi z uspyškaj Eboły, admianić hetyja miery, bo jany, pa słovach Hiebreisusa, zaminajuć baraćbie ź virusam.

SAAZ rekamienduje pravodzić sanitarny kantrol na vyjeździe — u aeraportach, marskich partach i na pamiežnych pierachodach, — kab praduchilić raspaŭsiudžvańnie infiekcyi za miežy krainy, ale nie ŭskładniać dastaŭku dapamohi i pracu miedycynskich słužbaŭ na miescach.

Raspaŭsiudžvańnie virusa

Uspyška vyklikana štamam Eboły «Bundybudžya». Pieršapačatkova zachvorvańnie było vyjaŭlena ŭ pravincyi DR Konha Itury, adnak paśla vypadki zaražeńnia byli paćvierdžanyja taksama ŭ pravincyjach Paŭnočnaje Kivu i Paŭdniovaje Kivu, a zatym i na terytoryi Uhandy.

Manitorynh raspaŭsiudžvańnia infiekcyi surjozna ŭskładniajecca niestabilnaj abstanoŭkaj u Itury, a taksama abmiežavanym dostupam da łabaratornaj dyjahnostyki i testavańnia.

U pravincyi Itury vostra staić pytańnie biaśpieki piersanału na fonie nieadnarazovych napadaŭ na centry lačeńnia Eboły i balnicy.

Z-za praciahłaha hvałtu miedycynskim słužbam usio ciažej adsočvać kantakty zaražanych, vyjaŭlać novyja vypadki i zabiaśpiečvać svoječasovaje akazańnie dapamohi.

Niedachop srodkaŭ baraćby ź virusam

Pa słovach miedykaŭ, jakija pracujuć u paciarpiełych rajonach DR Konha, kolkaść zachvarełych praciahvaje raści.

Usie pacyjenty — jak z padazreńniem na Ebołu, tak i z paćvierdžanym dyjahnazam — źmiaščajucca ŭ izalacyju. Luby čałaviek, jaki kantaktuje ź imi, abaviazany vykarystoŭvać poŭny kamplekt srodkaŭ indyvidualnaj abarony (SIA), a taksama śpiecyjalnyja prystasavańni, jakija źnižajuć ryzyku pieradačy infiekcyi.

Adnak zapasy SIA ŭ zonie ŭspyški Eboły abmiežavanyja.

Na minułym tydni Mižnarodny saviet miedsiaścior (ICN) papiaredziŭ pra surjozny niedachop achoŭnych kamplektaŭ.

«Miedsiostry bajacca za svajo žyćcio, tamu što ŭ ich niama nieabchodnaha abstalavańnia dla abarony», — padkreślili ŭ ICN.

Virus Eboła pieradajecca ad čałavieka da čałavieka praź bijałahičnyja vydzialeńni — kroŭ, ślinu, pot, irvotu.

Dadatkovaj prablemaj stała toje, što ŭ pieršyja dni ŭspyški dyjahnastavańnie adbyvałasia zanadta pavolna. Z-za zatrymak virus paśpieŭ vyjści spačatku za miežy pravincyi Itury, a potym i za miežy DR Konha — na terytoryju susiedniaj Uhandy.

Na dumku śpiecyjalistaŭ SAAZ, mienavita stračany ŭ pačatku epidemii čas staŭ adnoj z pryčyn takoha chutkaha pašyreńnia hieahrafii ŭspyški.

• 0
• 0
• 1
• 2
• 1
• 1
• 0
• 0