Mužčynskaja i žanočaja skura zahojvajucca pa-roznamu — pryčyna niečakanaja

Skura čałavieka pastajanna abnaŭlajecca dziakujučy stvałovym kletkam, jakija znachodziacca ŭ jaje vonkavym słoi — epidermisie. Jany dzielacca, utvarajučy novyja kletki. Častka ź ich zastajecca stvałovymi, a inšyja pastupova śpiecyjalizujucca, pieramiaščajucca da pavierchni skury i ŭrešcie adsłojvajucca. Adnak miechanizmy hetaha pracesu doŭhi čas zastavalisia pradmietam navukovych sprečak.

Kab vyśvietlić, jak abnaŭlajucca kletki skury, daśledčyki z Brusielskaha svabodnaha i Kiembrydžskaha ŭniviersitetaŭ vykarystoŭvali admysłovuju mikraskapiju. Na praciahu piaci miesiacaŭ jany sačyli za dzialeńniem stvałovych kletak i ich dalejšym raźvićciom. Pra vyniki ich pracy raskazvaje italjanskaja hazieta Corriere della Sera.

U samak myšej rany zahojvalisia chutčej

Navukoŭcy ŭbačyli, što stvałovyja kletki skury nie adrazu pieratvarajucca ŭ stałyja. Spačatku jany prachodziać pramiežkavuju stadyju, padčas jakoj jašče mohuć dzialicca, ale tolki abmiežavanuju kolkaść razoŭ. Pry hetym u samcoŭ i samak praces adbyvajecca pa-roznamu.

U samak dźvie kletki, jakija ŭtvarylisia paśla dzialeńnia adnoj maciarynskaj, čaściej dziejničajuć sinchronna: adnačasova praciahvajuć dzialicca abo pierachodziać da śpiecyjalizacyi. U samcoŭ hetyja pracesy mienš uzhodnienyja.

Daśledčyki taksama zaŭvažyli, što rany na skury samak myšej zahojvalisia chutčej, asabliva ŭ pieršyja dni paśla paškodžańnia. Častkova heta tłumačycca bolš skaardynavanaj pracaj kletak. Pa miery zahojvańnia roźnica pamiž samcami i samkami pamianšałasia.

Čamu takaja roźnica?

Daśledavańnie pakazała, što hetyja adroźnieńni źviazanyja ź dziejańniem pałavych harmonaŭ. Mužčynskija harmony, u tym liku testasteron, paskarajuć pieratvareńnie stvałovych kletak u śpiecyjalizavanyja kletki skury. Žanočyja ž spryjajuć bolš uzhodnienaj pracy kletak, jakija ŭtvarylisia ŭ vyniku adnaho dzialeńnia.

Kab pravieryć, ci dziejničaje padobny miechanizm u ludziej, navukoŭcy praviali ekśpierymienty z čałaviečaj skuraj, vyraščanaj u łabaratoryi. Jany ŭbačyli, što pad uździejańniem aktyŭnaj formy testasteronu kletki taksama chutčej pierachodzili da śpiecyjalizacyi.

Heta śviedčyć, što zaŭvažnyja ŭ myšej miechanizmy mohuć dziejničać i ŭ ludziej. Adnak daśledavańnie pakul nie dakazvaje, što ŭ žančyn rany zaŭsiody zahojvajucca chutčej, čym u mužčyn.

Čym heta adkryćcio moža być karysnym

Novyja źviestki pra adnaŭleńnie skury mohuć dapamahčy ŭ raspracoŭcy mietadaŭ lačeńnia apiokaŭ, paślaapieracyjnych ran i chraničnych jazvaŭ, u tym liku ŭ ludziej z dyjabietam.

Akramia taho, navukoŭcy płanujuć vyvučyć, jak pałavyja adroźnieńni ŭ pracy stvałovych kletak upłyvajuć na ŭźniknieńnie i raźvićcio raku skury.

Jak adznačajuć aŭtary daśledavańnia, poł čałavieka časta niedastatkova ŭličvajecca ŭ bijałohii i miedycynie, choć moža istotna ŭpłyvać na pracu kletak i raźvićcio zachvorvańniaŭ. Na ich dumku, uličvańnie hetych adroźnieńniaŭ moža adkryć novyja mahčymaści dla raspracoŭki mietadaŭ lačeńnia.

• 1
• 0
• 0
• 0
• 1
• 0
• 0
• 0